Azərbaycan, Bakı, 26 noyabr / Trend müxbir S.Kazımlı / Azərbaycanda ilk dəfə açılan Gənclərin Karyera Mərkəzinin xüsusi əhəmiyyəti var. Bu mərkəzdə İqtisad Universitetinin məzunları ilə yanaşı, bütün universitetlərin məzunları işlə təmin oluna bilərlər.
Trend -un məlumatına görə, bu barədə gənclər və idman naziri Azad Rəhimov çərşənbə günü Azərbaycanda İqtisad Universitetində yaradılan Gəncələrin Karyera Mərkəzinin açılışında jurnalistlərə deyib.
Nazir bildirib ki, Gənclərin Karyera Mərkəzi Gənclər və İdman Nazirliyinin, İqtisad Universitetinin və Dunya Əmək Təşkilatının birgə layihəsi əsasında açılıb. "Mərkəzdə internet baza yaradılıb. Bütün ali təhsil müəssisələrində nümayəndəliklərin yaradılması nəzərdə tutulub. Bu mərkəzin əsəs məqsədi ondan ibarətdir ki, universitet məzunlari işlə təmin edilsin", - deyə Rəhimov bildirib.
Nazir əlavə edib ki, mərkəzin açılması gənclərin iş yerləri axtarıb tapmasını və işlə təmin olunmasını təmin edəcək: "Gənclərin işlə təmin olunması üçün imkanlarımız əmək yarmarkalarının yaradılması, belə mərkəzlərin açılmasıdır. Gənclərlə bağlı 2005-ci 2009-cu illər Dövlət Proqramı çox uğurla həyata keçirilir. 2009-cu ildə dovlət proqramının nəticəsi açıqlanacaq"
Rəhimovun sözlərinə görə, gənclər müasir iş yerləri ilə təmin olunmaq üçün yüksək biliklərə malik olmalıdırlar. "İş yerlərində gənclərdən yüksək biliklər tələb edirlər. Gənclər bu biliklərə malik olsalar, onların işlə təmin olunması asan olar. Gənclər bəzi lazımi bilikləri əldə edə bilirlər. Ola bilsin ki, iş yerləri üçün bu, bəzi hallarda kifayət deyil", - deyə Rəhimov qeyd edib.
Məqalə müəllifi ilə əlaqə ünvanı:[email protected]
