Azərbaycan, Bakı, 23 yanvar / Trend , müxbir K.Zərbalıyeva/ Azərbaycan məhkəməsi Hacıqabul rayonunun Rəncbər kəndinin bir qrup sakininin torpağa olan mülkiyyət hüququnun pozuntusunu tanıyıb və dəymiş ziyana görə təzminat ödənilməsi barədə qərar qəbul edib.
Vətəndaşların Əmək Hüquqlarının Müdafiəsi Liqasının sədri Sahib Məmmədov cümə günü Trend -a bildirib ki, Şirvan Apellyasiya Məhkəməsi 14 iddiaçıya vurulmuş ziyana görə 30 min manatdan artıq kompensassiyanın Azərbaycan hökuməti tərəfindən ödənilməsinə qərar verib.
Rəncbər kəndinin bir qrup sakini mülkiyyətlərində olan torpaq sahəsindən Bakı-Supsa neft kəmərinin keçməsi ilə əlaqədar olaraq istifadə edə bilmədiklərini əsas gətirərək, 2006-cı ildə Azərbaycan Respublikası Dövlət Neft Şirkəti, Torpaq və Xəritəçəkmə Komitəsi və BP-ni məhkəməyə verib. Onlar torpağa olan mülkiyyət hüququnun pozuntusuna görə kompensasiyanın ödənilməsi və əldən çıxmış faydanın ödənilməsini tələb ediblər.
Şirvan Apellyasiya Məhkəməsi bir müddət öncə iddianın qismən təmin olunması barədə qərar çıxarsa da, Ali Məhkəmə işi təkrar baxılması üşün Şirvan Apellyasiya Məhkəməsinə qaytarmışdı.
Məqalə müəllifi ilə əlaqə ünvanı:[email protected]
