Azərbaycan, Bakı,20 iyul / Trend , muxbir K. Zərbaliyeva /
Azərbaycanda vəkilliyə keçirilən test imtahanında uğur qazanmış namizədlərlə müsabiqə yekunlaşıb.
Vəkillər Kollegiyasının sədr müavini Fərhad Nəcəfov bazar ertəsi Trend -a bildirib ki, iyulun 6-dan İxtisas Komissiyası tərəfindən namizədlərlə aparılan söhbət başa çatıb və nəticədə 68 nəfər müvəffəqiyyət qazanaraq vəkilliyə qəbul olub.
İxtisas Komissiyası 5 vəkildən, 3 hakimdən və 3 hüquqşünas alimdən ibarət tərkibdə formalaşıb.
Söhbət zamanı namizədlər qanunvericilik, hüquq sahəsində və intellektual səviyyənin müəyyən edilməsi üçün sualları cavablandırıblar.
Nəcəfov bildirib ki, gələn həftədən etibarən müsabiqədən uğur qazanmış vəkillər fəaliyyətə başlamaq üçün and içəcəklər.
Bu ilin mayında vəkil olmaq istəyən 471 nəfərlə test imtahanı keçirilib. İmtahanda 71 namizəd 60 və daha artıq bal toplayaraq müsahibəyə buraxılıb.
Trend -un arayışı: Azərbaycan vəkillərin sayına görə, Avropa ölkələri sırasında sonuncu yerlərdə durur. Almaniyalı ekspert Tomas Herman daha öncə mətbuata açıqlamalarının birində bildirib ki, Azərbaycanda əhalinin hər yüz min nəfərinə 5 vəkil düşür.
Amaniyalı ekspertin qənaətincə, ədalətli və obyektiv məhkəmə qərarının qəbul edilməsində peşəkar vəkillərin rolu var.
Hazırda Azərbaycanda 720-yə yaxın vəkil var.
Məqalə muəllifi ilə əlaqə unvanı: [email protected]