Azərbaycan, Bakı, 2 noyabr / Trend , muxbir K.Zərbalıyeva/
Azərbaycanın Ombudsman təsisatında uşaqlarla bağlı qaynar xətt yaradılıb.
Ombudsman Aparatının mətbuat xidmətindən bazar ertəsi Trend -a verilən məlumata görə, Rabitə və İnformasiya Texnologiyaları Nazirliyinin dəstəyi və texniki yardımı ilə yaradılan və 24 saat fəaliyyət göstərən "916" nömrəli qaynar xətt respublikanın şəhər və rayonlarında, kənd yerlərində yaşayan uşaqların, həmçinin qaçqın və məcburi köçkün, imkansız, ailə himayəsindən məhrum olmuş, uşaq müəssisələrində tərbiyə alan, habelə baxımsız olan, zorakılığa məruz qalan və digər hüququ pozulmuş uşaqların problemləri ilə bağlı müraciətləri qəbul edəcək.
Ölkə ərazisindəki bütün şəhər və rayon təhsil, səhiyyə şöbələrində, gənclər və idman, sosial müdafiə mərkəzlərində, polis idarələrində, təhsil müəssisələrində, məktəblərdə, uşaq yaradıcılıq və gənclər resurs mərkəzlərində, uşaq evləri və internat məktəblərində, mədəniyyət obyektlərində, o cümlədən uşaq kitabxanalarında, habelə qanunla ziddiyyətdə olan uşaqların yaşadığı müəssisələrdə və digər yerlərdə üçrəqəmli qaynar xəttlə bağlı məlumatın yayılması məqsədilə müvafiq dövlət orqanlarına, nazirliklərə və komitələrə, şəhər və rayon icra hakimiyyətlərinə məktublar ünvanlanıb.
Bu il Azərbaycanda BMT-nin Uşaq Hüquqları Bəyannaməsinin 50 və Uşaq Hüquqları Konvensiyasının 20 illiyi münasibətilə Uşaq İli elan olunub. Ombudsmanın təklifi ilə 20 oktyabr - 20 noyabr 2009-cu il tarixlərini əhatə edəcən "Uşaqları dinləyək, onların iştirakını təmin edək" devizi altında Uşaq hüquqları aylığı başlayıb.
Məqalə müəllifi ilə əlaqə ünvanı: [email protected]