Azərbaycan, Bakı, 12 aprel /Trend, müxbir T.Haciyev/
Azərbaycanda hazırda 10 Olimpiya kompleksi tikilməkdədir, - Trend-in məlumatına görə, bunu bazar ertəsi Bakıda Küveytin Gənclər və İdman Məsələləri Üzrə Dövlət Komitəsinin sədri Feysəl Musaid əl-Cəzzafın rəhbərlik etdiyi nümayəndə heyəti ilə görüşündə gənclər və idman naziri Azad Rəhimov bildirib.
"Azərbaycanda 26 Olimpiya kompleksi fəaliyyət göstərir, 10-nu isə tikilməkdədir", - Rəhimov deyib.
Feysəl Musaid əl-Cəzzafın rəhbərlik etdiyi nümayəndə heyətinin bu gündən Azərbaycana səfəri başlayıb.
Səfər çərçivəsində Azərbaycanla Küveyt arasında gənclər və idman sahələrində əməkdaşlığa dair memorandum imzalanacaq.
Nazirin sözlərinə görə, Azərbaycanda 170-ə yaxın gənclər təşkilatı fəaliyyət göstərir və nazirlik onların hər biri ilə əməkdaşlıq edir. Onların layihələri maliyyələşdirilir, birgə tədbirlər keçirilir. Həmçinin, beynəlxalq müstəvidə mübadilə proqramlarına böyük önəm verilir.
Aprelin 18-dək davam edəcək səfər zamanı Küveyt nümayəndə heyəti Quba, Qusar, Şağan Olimpiya komplekslərində olacaq, güləş üzrə Avropa çempionatının açılış mərasimində iştirak edəcək, ölkənin bir sıra gənclər təşkilatlarının üzvləri ilə görüş keçirəcək və Azərbaycanın tarixi yerlərinə baş çəkəcəklər.