Azərbaycan, Bakı, 25 may /Trend, müxbir H.Bağırov/
Azərbaycanda əsgər yoldaşına xəsarət yetirməkdə ittiham olunan hərbi qulluqçuların məhkəməsi başlayıb.
Trend-in məlumatına görə, bu gün Ağır Cinayətlərə Dair İşlər Üzrə Hərbi Məhkəmədə Müdafiə Nazirliyinin "N" saylı hərbi hissəsinin əsgərləri - Məhəmməd Paşayev və Rahil Əliyevin cinayət işi üzrə keçirilən prosesdə prokuror ittiham aktını elan edib.
Təqsirləndirilən şəxslər elan olunmuş ittiham üzrə özlərini təqsirli bilməyiblər.
İttihama görə, təqsirləndirilən şəxslər 2009-cu ilin sentyabrında hərbi hissədə xidmətdə olarkən əsgər yoldaşları Eşqin Əhmədovla mübahisə ediblər. Mübahisə nəticəsində təqsirləndirilən şəxslər Əhmədovu döyüblər və daha sonra ona bıçaqla xəsarət yetiriblər.
Əhmədov vaxtında xəstəxanaya çatdırıldığından, onun həyatını xilas etmək mümkün olub.
Təqsirləndirilən şəxslər Cinayət Məcəlləsinin iki və ya daha çox şəxsə qarşı, habelə təkrar və ya bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən qəsdən sağlamlığa ağır zərər vurma (126.2.1) maddəsi ilə ittiham edilirlər.
