Azərbaycan, Bakı, 4 iyun /Trend, müxbir H.Bağırov/
Azərbaycanda casusluqda və dövlətə xəyanətdə ittiham olunan hərbi qulluqçuların apelyasiya şikayəti təmin edilməyib. Trend-in məlumatına görə, bu gün Bakı Apelyasiya Məhkəməsində Azərbaycan Ordusunun "N" saylı hərbi hissəsinin əsgərləri Həmidov Pərviz Zakir oğlu və Qasımov Polad Siyavuşoviçin apelyasiya şikayəti üzrə qərar elan edilib.
Qərara görə, təqsirləndirilən şəxslərin apelyasiya şikayəti təmin edilməyib və Ağır Cinayətlərə Dair İşlər Üzrə Hərbi Məhkəmənin hökmü qüvvədə saxlanılıb.
Təqsirləndirilənlər Ermənistan silahlı qüvvələrinin hərbi kəşfiyyatı ilə əməkdaşlıq edərək, Azərbaycanın dövləti maraqlarına xələl gətirən hərəkətlərə yol veriblər.
Onlar Cinayət Məcəlləsinin dövlətə xəyanət (277), döyüş növbəsi çəkmə qaydalarını pozmaqla dövlətin təhlükəsizlik mənafelərinə zərər vurmaq (338.1), casusluq (276) maddələri ilə ittiham olunublar.
Ağır Cinayətlərə Dair İşlər Üzrə Hərbi Məhkəmənin hökmü ilə təqsirləndirilən şəxslərin hər biri 13 il müddətinə azadlıqdan məhrum edilib.
