Azərbaycan, Bakı, 5 noyabr /Trend, müxbir K.Zərbalıyeva/
Bakının Binəqədi və Nəsimi rayon məhkəmələri Mülki-Prosessual və Cinayət-Prosessual məcəllələrinin bir neçə maddəsinin şərh olunması ilə bağlı Konstitusiya Məhkəməsinə müraciət edib.
Konstitusiya Məhkəməsindən Trend-ə verilən məlumata görə, Nəsimi rayon məhkəməsi KM-yə müraciət edərək Mülki-Prosessual Məcəllənin 11-ci maddəsinin şərh olunmasını xahiş edib.
Həmin maddədə nəzərdə tutulur ki, mülki işlər və iqtisadi mübahisələr üzrə məhkəmə icraatı dövlət dilində - Azərbaycan dilində və ya müəyyən ərazi əhalisinin əksəriyyətinin dilində aparılır. İşdə iştirak edən, məhkəmə icraatının aparıldığı dili bilməyən şəxslərə işin bütün materialları ilə tanış olmaq, izahat, ifadə və rəy vermək, məhkəmədə çıxış etmək, vəsatət qaldırmaq, ana dilində şikayət etmək, həmçinin, bu Məcəlləyə uyğun olaraq pulsuz tərcüməçi xidmətindən istifadə etmək hüququ izah və təmin olunur.
Məhkəmə sənədləri işdə iştirak edən şəxslərə məhkəmə icraatının aparıldığı dildə verilir.
Nəsimi rayon məhkəməsinin müraciətində qeyd edilir ki, həmin maddə məhkəmə icraatı dövrü üçün nəzərdə tutulub.
Məhkəmə icraatına qədərki dövrdə dövlət dilini bilməyən şəxslərin məhkəməyə təqdim etdiyi sənədlərin hansı dildə tərtib olunması ilə bağlı həmin maddədə heç bir göstəriş yoxdur.
Nəsimi rayon məhkəməsi bu məsələyə aydınlıq gətirilməsi üçün həmin müddəanın şərh olunmasını istəyib.
Binəqədi rayon məhkəməsi isə müraciətində Cinayət-Prosessual Məcəllənin 294 və 297-ci maddələrinin şərh olunmasını istəyib.
Müraciətdə həmin maddələrdə nəzərdə tutulan böyük ictimai təhlükə törətməyən cinayətlərin izahının verilməsi xahiş olunur.