Azərbaycan, Bakı, 9 dekabr /Trend, müxbir K.Zərbalıyeva/
Azərbaycan ombudsmanı saxlanılan şəxsin Dövlət Gömrük Komitəsinin Astara keçid məntəqəsində döyülməsi faktının araşdırılması ilə bağlı baş prokurora müraciət edib.
Ombudsman Aparatının mətbuat xidmətinin cümə axşamı yaydığı məlumata görə, Aparatın Milli Preventiv Mexanizm (MPM) qrupunun üzvləri İnsan Hüquqları üzrə Müvəkkil Elmira Süleymanovanın tapşırığına əsasən, onun ünvanına daxil olmuş müraciətlərin araşdırılması məqsədilə Ədliyyə Nazirliyi Penitensiar Xidmətin Bakı İstintaq Təcridxanasında araşdırma aparıblar.
Onlar təcridxanada saxlanılan on iki şəxslə görüşüblər.
Söhbət aparılmış şəxslərdən biri Dövlət Gömrük Komitəsinin Astara keçid məntəqəsində saxlanılaraq döyüldüyünü, habelə həmin komitənin istintaq idarəsində kobud rəftara məruz qaldığını söyləyib.
Bu faktla bağlı müvafiq akt tərtib edilib.
Ombudsman məsələnin obyektiv araşdırılması, həmin şəxsin təcili məhkəmə-tibb ekspertizasından keçirilməsi üçün baş prokurora müraciət edib.
Həmin şəxslər saxlanma şəraitindən, müəssisə rəhbərliyi və əməkdaşları tərəfindən onlara qarşı rəftardan şikayət etməyiblər.
Onların bəziləri barələrində çıxarılmış məhkəmə hökmündən, istintaqın qeyri-obyektiv aparılmasından, Cinayət Məcəlləsinin müvafiq maddəsinin onlara düzgün tövsif edilməməsindən narazılıqlarını bildiriblər.
