Azərbaycan, Bakı, 13 dekabr /Trend, müxbir M.Əliyev/
Azərbaycanın İsmayıllı rayonunda turizm sahəsində kadr hazırlığına başlanılıb. Təhsil Nazirliyinin Texniki peşə təhsili şöbəsinin müdiri Namiq Məmmədov bazar ertəsi Trend-ə bildirib ki, nazirlik Avropa İttifaqı ilə birgə həyata keçirilən proqram çərçivəsində İsmayıllı rayonunda yaradılmış müasir tipli peşə təhsil kompleksində barmen, aşpaz, ofisiant kimi yeni ixtisaslar üzrə kadr hazırlığına başlayıb.
Məmmədovun sözlərinə görə, 2010-cu ilin sonuna kimi kompleksin rəsmi açılışı olacaq.
"İsmayıllıdakı müasir tipli peşə təhsil kompleksi böyük olduğundan orada təkcə turizm deyil, digər sahələr üzrə də peşə təhsili veriləcək", - Təhsil Nazirliyinin şöbə müdiri bildirib.
Məmmədov bildirib ki, "Azərbaycan Respublikasında texniki peşə təhsilinin inkişafı üzrə Dövlət Proqramının (2007-2012-ci illər) təsdiq edilməsi haqqında" Azərbaycan Prezdentinin sərəncamına əsasən, ötən üç il ərzində 10-a yaxın peşə təhsili müəssisəsi əsaslı təmir edilib və müasir avadanlıqlarla təchiz edilib, daha üç peşə təhsil müəssisəsində əsaslı təmir işləri başlanılıb.
Hazırda Azərbaycanda 107 peşə təhsili müəssisəsi fəaliyyət göstərir. Onlardan 47-si peşə liseyi, 60-ı isə peşə məktəbidir. Respublikanın peşə təhsili müəssisələrində 101 peşə üzrə 23 mindən çox şagird təhsil alır.