Azərbaycan, Bakı, 27 iyun /Trend/
Serbiyanın Zrenyanin şəhərində gənclərin güləş üzrə Avropa çempionatı başa çatıb.
Azərbaycan Güləş Federasiyasından Trend-ə verilən məlumata görə, çempionatın son iki günündə yunan-roma güləşçiləri mübarizəyə qoşulublar və döşək üzərinə çıxan 8 idmançımızdan 4-ü medal qazanıb.
50 kq çəki dərəcəsində yarışan Vilayət Qəhrəmanlı mübarizəyə 1/8 finaldan başlayıb, əvvəlcə Ukrayna güləşçisi Vilati Kovalenkonu tam üstünlüklə məğlub edib (7-0, 7-0). ¼ finalda macar Bense Yuxaş da pəhləvanımızın qarşısında davam gətirə bilməyib (1-0, 6-0). Yarımfinalda Türkiyə güləşçisi Tolqaxan Karataşla qarşılaşma isə kifayət qədər gərgin alınıb. İlk hissədə 0-1 hesabı ilə uduzan Vilayət sonrakı 2 hissədə üstün olaraq finala çıxıb (2-0, 1-0). Həlledici qarşılaşmada Gürcüstan idmançısı Nika Tsestkladze üzərində qələbə (6-3, 7-5) Vilayət Qəhrəmanlıya Avropa çempionatının qızıl medalını qazandırıb.
60 kq-da mübarizə aparan Rövşən Tağıyev də qızıl medala çox yaxın olub. İspan Kevin Martinez (6-0, 7-0), macar Mate Kraşnay (6-0, 4-0) və yunan Matias Vladimiros (8-1, 2-1) üzərində qələbələr Rövşəni finala çıxarıb. Amma sonuncu qarşılaşmada Rusiya nümayəndəsi Əsgər Orşokduqova məğlub olan (0-1, 0-3) Rövşən Tağıyev 2-ci yeri tutub.
Avropa çempionatının son günü Eldəniz Əzizli (55 kq), Rəsul Çunayev (66 kq), Fuad Əliyev (84 kq) və Zaur Mehrəliyev (120 kq) medallar uğrunda yarışıblar.
55 kq çəkidə Eldəniz Əzizli ardıcıl olaraq fransız Toni Roberti (3:0, 7:0), litvalı Ramunas Dagysi (4:0, 7:0), yarımfinalda isə bolqar Nikolay Vıçevi tam üstünlüklə (6:0, 3:1) məğlub edərək finala yüksəlib. Finalda təmsilçimizin rəqibi belarus Andrey Pikuza olub. Eldəniz Əzizli qarşılaşmanın hər iki hissəsində (7:0, 7:0) təmiz qələbə ilə yığmamıza növbəti qızıl medal qazandırıb.
66 kq-da Rəsul Çunayev bürünc medal qazanıb. Medala qədər Polşa təmsilçisi Vanke Qrzeqorzu (2:0, 3:0), finlandiyalı Etlinger Dominiki (2:0, 0:1, 3:0), serbiyalı Nemes Viktoru (7:0, 2:1) məğlub edib, yalnız rusiyalı Maqomed Çuxalova məğlub olub. Bürünc medal uğrunda görüşdə isə Ermənistan təmsilçisi ilə qarşılaşan Rəsul Çunayev hər iki hissədə (1:0, 2:1) üstün olub.
Beləliklə, yunan-Roma güləşi üzrə gənclərdən ibarət yığmamız Avropa çempionatını 2 qızıl, 1 gümüş və 1 bürünc medalla başa vurub. Azərbaycan yığması komanda hesabında Türkiyə, Rusiya və Gürcüstandan sonra dördüncü olub.
Ümumilikdə gənc güləşçilərimiz 2011-ci ilin Avropa çempionatında 12 medal qazanıblar. Bunlardan 3-ü qızıl, 5-i gümüş, 4-ü isə bürüncdür.