Azərbaycan, Bakı, 2 aprel /Trend, müxbir İ.İsabalayeva/
Azərbaycanın paytaxtı Bakıda keçiriləcək "Eurovision 2012" mahnı müsabiqəsində birincilik qazanan mahnı yarışmanın 60-cı qalib mahnısı olacaq. Trend bazar ertəsi eurovision.az saytına istinadən məlumat verir ki, müsabiqənin 57-ci dəfə keçirilməsinə baxmayaraq, bu il 60-cı mahnı qalib elan ediləcək.
"Eurovision" mahnı müsabiqəsinin təşkilati işlər üzrə rəhbəri Sietse Bakker deyib ki, Avropa Yayımları Birliyi (EBU) müsabiqənin 60 illik yubileyini xüsusi şəkildə qeyd etmək istəyir.
"2015-ci ildə müsabiqənin brilyant yubileyi olacaq. EBU 60-cı "Eurovision"u qeyri-adi etmək istəyir", - Bakker bildirib.
Xatırladaq ki, 1969-cu ildə müsabiqədə qeyri-adi hadisə baş vermişdi. Həmin il İspaniya, Böyük Britaniya, Fransa və Niderlandın mahnıları eyni səs - 18 bal qazanmışdı. "Eurovision" mahnı müsabiqəsinin Məşvərət Qrupunun iclasında bu dövlətlərin hər birinin mahnısı qalib elan olunmuşdu.
Məşvərət Qrupu növbəti iclasında belə bir hal baş verəcəyi təqdirdə atılacaq addımı müzakirə edəcək.