Azərbaycan, Bakı, 26 aprel /Trend, müxbir İ.İzzət/
Bakı şəhəri, Suraxanı rayonu, Əmircan qəsəbəsi, 4-cü mədən ünvanında fəaliyyət göstərən "Əliyev və K" Şəxsi İstehsalat Kommersiya Şirkətində ictimai iaşə müəssisələri üçün elektrik və qaz plitələri, vitrin soyuducularının istehsalı və satışı qadağan edilib.
Standartlaşdırma, Metrologiya və Patent üzrə Dövlət Komitəsinin İnformasiya Texnologiyaları və İctimaiyyətlə əlaqələr şöbəsindən Trend-ə verilən məlumata görə, adıçəkilən Komitə yanında Texniki Tənzimləmə və Standartlaşdırma üzrə Dövlət Nəzarəti Xidməti tərəfindən hüquqi ünvanı Bakı şəhəri, Nəsimi rayonu, V.Plotnikov ev 20, istehsal sahəsinin ünvanı Bakı şəhəri, Suraxanı rayonu, Əmircan qəsəbəsi, 4-cü mədən olan "Əliyev və K" Şəxsi İstehsalat Kommersiya Şirkətində dövlət nəzarəti tədbirləri həyata keçirilib.
Araşdırma zamanı müəyyən olunub ki, müəssisədə istehsal olunan vitrin soyuducuları, ictimai iaşə müəssisələri üçün qaz və elektrik plitələrinin təhlükəsizliyi, normativ sənədlərin tələblərinə uyğunluğu təsdiq edilməyib, AZS milli sertifikatlaşdırma sistemində sertifikatlaşdırılmayıb. İstehsal prosesində istifadə olunan 167 ədəd ölçmə və sınaq vasitələrinin heç biri müqayisəli yoxlamadan keçirilməyib. Bununla da sahibkar tərəfindən "İstehlakçıların hüquqlarının müdafiəsi haqqında" və "Ölçmələrin vəhdətinin təmin edilməsi haqqında" Azərbaycan Respublikasının qanunlarının tələbləri pozulub.
Aşkar olunmuş pozuntularla bağlı "Əliyev və K" Şəxsi İstehsalat Kommersiya Şirkətinə nöqsanların aradan qaldırılması barədə iradnamə, müqayisəli yoxlamadan keçməmiş ölçmə və sınaq vasitələrinin istismardan çıxarılması barədə tələbnamə verilib. Həmçinin şirkətə ictimai iaşə müəssisələri üçün elektrik və qaz plitələri, vitrin soyuducularının istehsalı və satışı qadağan edilib.