Azərbaycan, Bakı, 29 aprel /Trend, müxbir E.Mehdiyev/
Azərbaycanda il ərzində əməyin mühafizəsi qaydalarının pozulmasına görə 250-yə yaxın insan həyatını itirirdi. Son illər ərzində isə bu rəqəm 80-ə düşüb. Trend-in məlumatına görə, bunu əmək və əhalinin sosial müdafiəsi nazirinin müavini Mətin Kərimli 28 aprel - Əməyin Mühafizəsi Günü ilə əlaqədar keçirilən tədbirdə çıxış edərkən deyib.
M.Kərimli qeyd edib ki, əməyin mühafizəsi qaydalarının pozulmasına görə dünyada 2 milyon 340 min nəfərə yaxın insan həlak olur. Onun sözlərinə görə, Azərbaycanda əvvəllər 100 min nəfərə 16 belə hadisə düşürdüsə, hazırda bu rəqəm 4 dəfəyə qədər azalıb: "Bu da o deməkdir ki, insan ölümünün sayı azalıb".