...

267 şəxs Azərbaycan vətəndaşlığına qəbul edilib (FOTO)

Cəmiyyət Materials 22 Yanvar 2016 12:34 (UTC +04:00)
Ötən il Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən 105.550 müraciət daxil olub.
267 şəxs Azərbaycan vətəndaşlığına qəbul edilib  (FOTO)

Bakı. Trend:

Ötən il Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən 105.550 müraciət daxil olub.

Trend-in məlumatına görə, bunu Dövlət Miqrasiya Xidmətinin 2015-ci ilin yekunlarına və bu il qarşıda duran vəzifələrin icrasına həsr olunmuş xidməti müşavirəsində Xidmətin rəisi, II dərəcəli dövlət miqrasiya xidməti müşaviri Firudin Nəbiyev deyib.

F.Nəbiyev bildirib ki, müraciətlərin hər biri ayrı-ayrılıqda qanunvericiliyin tələblərinə uyğun olaraq araşdırılıb və müvafiq qərarlar qəbul edilib.

F.Nəbiyevin sözlərinə görə, Xidmət ölkədə vətəndaşsızlıq halları ilə mübarizə sahəsində məlumatlandırma və maarifləndirmə işinin artırılması və bu şəxslərin hüquqi statusunun müəyyənləşdirilməsi zamanı yaranan problemlərin, o cümlədən, onların hüquqlarının səmərəli müdafiəsi naminə kompleks tədbirlərin icrasına start verib.

Xidmət rəisi deyib ki, ötən il Azərbaycan Prezidentinin sərəncamları ilə 267 şəxs vətəndaşlığa qəbul, 9 nəfər isə bərpa edilib.

Onun sözlərinə görə, hesabat dövründə müraciətlər əsasında 53.200 şəxsə və onunla birlikdə immiqrasiya edən 18 yaşına çatmamış övladlarına Azərbaycan Respublikasında müvəqqəti və 2640 şəxsə daimi yaşamaq icazələri verilib, 885 şəxsin ölkə ərazisində müvəqqəti olma müddəti uzadılıb.

Xidmət rəisi vurğulayıb ki, qanunsuz miqrasiyaya qarşı ciddi mübarizə aparılır. Onun sözlərinə görə, ötən il əcnəbilər və vətəndaşlığı olmayan 26.567 şəxs tərəfindən inzibati qanunvericiliyin pozulması halı aşkar edilib və müvafiq tədbirlər görülüb.

F.Nəbiyev əlavə edib ki, ötən il ölkədə qalma müddətinə müvafiq olaraq respublikamıza girişi qeydə alınmış əcnəbilərdən 670.326 nəfər olduğu yer üzrə qeydiyyata alınıb.

Onun sözlərinə görə, neft-qaz layihələrində əcnəbi işçi heyətin mərhələlərlə milli kadrlarla əvəzlənməsi məsələlərinə nəzarət gücləndirilir.

Məqalədə:
Xəbər lenti

Xəbər lenti