Bakı. Trend:
Noyabrın 22-də Latviyanın Preyli şəhər dumasının sədri Maruta Plivdanın rəhbərlik etdiyi nümayəndə heyəti Bakı şəhərinin Qaradağ rayonunda səfərdə olub.
Qaradağ Rayon İcra Hakimiyyətindən Trend-ə verilən məlumata görə, görüşdə Qaradağ Rayon İcra Hakimiyyətinin başçısı Süleyman Mikayılov, Latviyanın Azərbaycandakı fövqəladə və səlahiyyətli səfiri Yuris Maklakovs və rayonun ictimaiyyət nümayəndələri iştirak ediblər.
Qonaqlar ilk öncə Ulu Öndər Heydər Əliyevin büstünün önünə gül qoyublar, daha sonra Heydər Əliyev muzeyində Ümummilli Liderin həyat və fəaliyyəti ilə tanış olublar.
Görüşdə bildirilib ki, Azərbaycan və Latviya arasında regional əlaqələrin inkişafı istiqamətində işlər davam etdirilməkdədir. Ölkələr arasında qarşılıqlı səfərlərin məntiqi nəticəsi olaraq, 2011-2017-ci illərdə iki ölkənin bir sıra yerli orqanları arasında qarşılıqlı əməkdaşlıq haqqında müqavilələr imzalanmış, təcrübə mübadiləsi və müzakirələr aparılmışdır. Bu əməkdaşlığın məntiqi nəticəsi olaraq 2017-ci ilin iyul ayında Azərbaycan Respublikasının Prezidenti İlham Əliyevin Latviyaya rəsmi səfəri zamanı Latviya Respublikasının Prezidenti ilə keçirilmiş ikitərəfli görüş zamanı yerli hakimiyyətlər və bələdiyyələrin əməkdaşlığı sahəsində görülən işlər xüsusilə vurğulanıb.
2012-ci ildən Latviyanın Preyli diyar bələdiyyəsi ilə Azərbaycanın Qaradağ rayonunun Sahil bələdiyyəsi qardaşlaşmış bələdiyyələrdir. Dostluq və işgüzar əlaqələrin daha da gücləndirilməsi, təcrübə mübadiləsi və yeni layihələrin icrası ilə bağlı görüşlərin keçirilməsi məqsədi ilə Preyli şəhər dumasının sədri Maruta Plivdanın rəhbərlik etdiyi 4 nəfərdən ibarət nümayəndə heyəti Bakıda səfərdədir.
Nümayəndə heyəti Qaradağ rayonu ilə yaxından tanış olub və səfər çərçivəsində aparılan danışıqlar davam etdiriləcək.
Trend-in ən mühüm və maraqlı xəbərlərini "Telegram"da izləyin
.jpg)
.jpg)
