Bakı. Samir Əli - Trend:
Bakıda fəaliyyət göstərən 175 saylı sərnişin avtobusda yanvarın 13-dən etibarən məsafədən asılı olmayaraq gediş haqqı 30 qəpik olacaq.
Bu barədə Trend-ə açıqlamasında "BakuBus" MMC-nin İctimaiyyətlə əlaqələr şöbəsinin müdiri Mansur Piriyev deyib.
Onun sözlərinə görə, həmin tarixdən adıçəkilən marşrut üzrə gediş haqqı kart sistemi ilə həyata keçiriləcək və qiymət 30 qəpik təşkil edəcək:
"Tarif (qiymət) Şurasının bununla bağlı qərarı var. Bakıətrafı ərazilərə işləyən marşrutların qiyməti məsafəyə görə hesablanır. 175 saylı marşrutda da qiymət həmin qərara əsasən 30 qəpik müəyyənləşdirilib. Bu vaxta qədər kimsə avtobusla qısa məsafə qət edərək 20 qəpik ödəyirdisə, indi bu, mümkün olmayacaq. Çünki Tarif Şurası dayanacağa görə qiymət müəyyənləşdirmir. Yanvarın 13-dən etibarən də marşrutda Şuranın həmin qərarına uyğun gediş haqqı tətbiq olunacaq".
Qeyd edək ki, yanvarın 13-dən bu xətt üzrə avtobuslar Hövsan qəsəbəsinin mərkəzindən “28 may” metrostansiyasınadək hərəkət edəcək.