...

Küveytdə AXC-nin 100 illik yubileyinə həsr olunmuş konsert keçirilib (FOTO)

Cəmiyyət Materials 19 May 2018 20:37
Küveytdə AXC-nin 100 illik yubileyinə həsr olunmuş konsert keçirilib
Küveytdə AXC-nin 100 illik yubileyinə həsr olunmuş konsert keçirilib (FOTO)

Trend-i buradan izləyin

Bakı. Trend:

Küveyt Dövlətinin “Əbdulhüseyn Əbdülrıda” teatrında Azərbaycan Respublikasının Küveyt Dövlətindəki səfirliyinin təşəbbüsü və təşkilatçılığı ilə, Küveyt Dövləti Mədəniyyət, İncəsənət və Ədəbiyyat üzrə Milli Şuranın, “Küveyt-Azeri Est.” və “Wataniya Airways” şirkərlərinin dəstəyi ilə Azərbaycan Xalq Cümhuriyyətinin 100 illik yubileyinə həsr olunmuş Üzeyir Hacıbəyli adına Bakı Musiqi Akademiyasının “Baku Chamber Orchesta” gənclər kamera orkestrinin konserti keçirilib.

Azərbaycanın Küveytdəki Səfirliyindən Trend-ə verilən məlumata görə, konsertdə Küveytin dövlət rəsmiləri, mədəniyyət və incəsənət xadimləri, Küveyt Xarici İşlər Nazirliyinin əməkdaşları, burada akkreditə olunmuş diplomatik və beynəlxalq nümayəndəliklərin rəhbərləri və diplomatik korpusun digər əməkdaşları, Küveytdə yaşayan, işləyən, təhsil alan həmvətənlərimizi özündə birləşdirən “Vətənsevər Dostluq Çəmiyyəti”nin üzvləri, Səfirliyin əməkdaşları və ailə üzvləri, Küveyt Dövləti Mədəniyyət, İncəsənət və Ədəbiyyat üzrə Milli Şuranın Baş katibi və şuranın əməkdaşları iştirak ediblər.

Daha sonra Azərbaycanın Küveytdəki səfiri Elxan Qəhrəman çıxış edərək, ilk növbədə sözügedən konsertin təşkilində göstərdiyi köməyə görə Küveyt Dövləti Mədəniyyət, İncəsənət və Ədəbiyyat üzrə Milli Şuranın Baş katibi Əli Əl-Yuhaya və şuranın əməkdaşlarına, “Küveyt-Azeri Est.” və “Wataniya Airways” şirkərlərinin rəhbər heyətinə, o cümlədən "Bakı Kamera Orkestrinin bədii rəhbəri, SSRİ və Azərbaycan xalq artisti, Bakı Musiqi Akademiyasının rektoru Fərhad Bədəlbəyliyə dəvəti qəbul edib Orkestrin konsertinin qardaş Küveyt Dövlətində keçirilməsinə razılıq verdiyi üçün öz təşəkkürünü bildirib. Daha sonra Azərbaycan Xalq Cümhuriyyətinin yaradılmasının həm Azərbaycan, həm də bölgə üçün əhəmiyyəti, respublikanın qısa müddət ərzində qazandığı nailiyyətləri, beynəlxalq miqyasda tanınması istiqamətində apardığı mübarizəsi, habelə Azərbaycan xalqının 1991-ci ildə öz dövlət müstəqilliyini bərpa etdikdən sonra Azərbaycan Xalq Cümhuriyyətinin ideallarını davam etdirərək bu tarixi varislik üzərində yeni müstəqil Azərbaycan dövlətini yaratdığı barədə iştirakçılara məlumat verib.

Həmçinin, Azərbaycan Respublikasının Prezidenti cənab İlham Əliyevin 2018-ci ili ölkəmizdə “Azərbaycan Xalq Cümhuriyyəti İli” elan etdiyini və İl ərzində həm ölkəmizdə, həm də xaricdə bununla əlaqədar bir çox tədbirlərlərin keçiriləcəyini bildirib.

Daha sonra orkestrin ifasında Azərbaycan Respublikası və Küveyt Dövlətinin Himnləri səsləndirilmişdir. Konsert proqramında Qara Qarayev, Niyazi, Fikrət Əmirov, Toqfiq Quliyev, Fərhad Bədəlbəyli, Aqşin Əlizadə, habelə tanınmış Qərb bəstəkarlarının əsərləri ifa olunub. Azərbaycan Respublikasının Xalq artisti Yalçın Adıgözəlovun dirijorluğu ilə baş tutan konsertdə solistlər qismində Xalq artisti, pianoçu, professor Yeganə Axundova, Xalq artisti Mənsum İbrahimov, Əməkdar artistlər Elçin Həşimov, Elnur Əhmədov, Gənc ifaçılar - Beynəlxalq Müsabiqələr Laureatları – Mahir Tağızadə, Ümidə Abbasova, Aytən İbrahimova, Fuad Əlizadə, Respublika müsabiqələr laureatı Orxan Cəlilov və Muğam Televiziya Müsabiqəsinin qalibi Sədəf Budaqova iştirak ediblər.

Konsertdə xalq artisti Mənsum İbrahimov tərəfindən əməkdar artistlər - tarda Elçin Həşimov, kamançada Elnur Əhmədovun müşaiyəti ilə xalq və bəstəkar mahnıları səsləndirilib. Konsert tamaşaçılar tərəfindən sürəkli alqışlarla qarşılanıb.

Məqalədə:
Xəbər lenti

Xəbər lenti