...

Mərkəzi Gömrük Hospitalının otorinolarinqoloqu “Həkimlərimizi tanıyın!” rubrikasında

Cəmiyyət Materials 2 Sentyabr 2020 11:16 (UTC +04:00)
Mərkəzi Gömrük Hospitalının otorinolarinqoloqu “Həkimlərimizi tanıyın!” rubrikasında

Trend-i buradan izləyin

Bakı. Trend:

“Həkimlərimizi tanıyın!” rubrikamızda Sizə peşəkarlığı ilə seçilən və pasiyentləri arasında böyük rəğbət qazanmış otorinolarinqoloq, tibb üzrə fəlsəfə doktoru Elvin Əzizovu təqdim edirik. Dr. Elvin Əzizov Mərkəzi Gömrük Hospitalında adenoidektomiya, tonzillektomiya, qulaq pərdəsinə parasentez boru yerləşdirilməsi, xarici qulağın plastikası, açıq və qapalı burun çəpər əyriliyi əməliyyatı, rinoplastika, burun polipləri və burun cibləri xroniki iltihablı xəstəliklərinin cərrahi yolla təmizlənməsi, boynun ön və yan divarının kistlərinin əməliyyatı, qırtlaq biopsiyaları və poliplərinin xaric edilməsi əməliyyatını həyata keçirir.

Dr. Elvin Əzizov 2007-ci ildə Azərbaycan Tibb Universitetini bitirmiş, 2007-2009-cu illərdə Ukraynada Xarkov Diplomdansonrakı Tibb Akademiyasının otorinolarinqologiya kafedrasında ordinatura, 2010-2013-cü illərdə isə aspirantura təhsili almışdır. O, 2013-2015-ci illərdə Xarkov Diplomdansonrakı Tibb Akademiyasının otorinolarinqologiya kafedrasında uşaq otorinolarinqoloqu kimi fəaliyyət göstərmişdir. Dr.Elvin Əzizov 2015-ci ildən Mərkəzi Gömrük Hospitalında həkim-otorinolarinqoloq kimi çalışır.

Ukraynanın paytaxtı Kiyev şəhərində A.S Kolomiyçenko adına Elmi Tədqiqat Otorinolarinqologiya İnstitutunda "Ağırlaşmış sinusitli xəstələrdə cərrahi müalicənin fotohemoterapiya istifadəsi ilə optimallaşdırılması" mövzusunda dissertasiya müdafiə edərək tibb üzrə fəlsəfə doktoru elmi dərəcəsi almışdır.

Daim öz üzərində işləyən, qabaqcıl təcrübəni öyrənərək öz işində tətbiq edən Dr. Elvin Əzizov 2012-ci ildə Ukrayna həkim-otorinolarinqoloaqların elmi-tibbi birliyinin "LOR orqanlarının xroniki iltihabi xəstəliklərinin müasir müalicə və diaqnostika metodları" adlı elmi-praktiki konfransında, 2019-cu ildə Rusiyanın Sankt-Peterburq şəhərində burun boşluğu, paranazal sinusların və kəllə əsasının kadavra materialı üzərində endoskopik sinus cərrahiyyəsi kursunda iştirak etmişdir.

Dr. Elvin Əzizov COVİD-19 infeksiyasının ölkəmizə ayaq basdığı ilk gündən bu gözəgörünməz düşmənlə mübarizəyə səfərbər olan ilk həkimlərdən biridir. O, fevral ayında Astara Gömrük postuna ezam olunmuş və burada İrandan Azərbaycana gələn vətəndaşları yoxlayan ilk həkimlər briqadasının tərkibində fəaliyyət göstərmişdir. Həkim barədə daha ətraflı məlumat almaq üçün bu linkə daxil ola bilərsiniz: https://customshospital.az/elvin-azizov/.

Məqalədə:
Xəbər lenti

Xəbər lenti