Bakı. Trend:
Xaçmaz rayonunda 20 Yanvar faciəsi qurbanlarının 35-ci ildönümü dərin ehtiramla yad edilib.
Trend xəbər verir ki, tədbirdə Xaçmaz Rayon İcra Hakimiyyətinin başçısı Elnur Rzayev, yerli hüquq-mühafizə orqanlarının rəhbərləri, şəhid ailələri, qazilər və ictimaiyyət nümayəndələri iştirak edib.
Rayon İcra Hakimiyyətinin başçısı Elnur Rzayev Xaçmaz şəhərindəki Şəhidlər Xiyabanında “Əbədi məşəl” abidə-kompleksi önünə əklil qoyub.
Tədbir iştirakçıları vətənimizin azadlığı uğrunda canından keçən qəhrəman oğul və qızlarımızın xatirəsini ehtiramla yad edib, xaçmazlı şəhidlərin eləcədə 20 Yanvar şəhidi Zahid Abdullayevin xatirə lövhəsi önünə tər qərənfillər düzüb. Milli Qəhrəman Yavər Şahbazovun büstü ziyarət olunub.
Rayon İcra Hakimiyyətinin başçısı Elnur Rzayev şəhid ailələri söhbət edib, qayğıları ilə maraqlanıb. Bildirib ki, 20 Yanvar faciəsi təkcə ümumxalq hüzn günü kimi deyil, eyni zamanda, öz azadlığına və müstəqilliyinə can atan xalqımızın mübarizliyini, məğrurluğunu nümayiş etdirən qəhrəmanlıq tarixi kimi qeyd olunur.
Prezident, Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun qazandığı tarixi Qələbə xalqımızın milli azadlıq və dövlətçilik arzularını tam reallaşdırıb.
Saat 12:00-da Yanvar faciəsi şəhidlərinin, eləcə də Azərbaycanın ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib. Rayon ərazisində avtomobillərin hərəkəti dayandırılıb.
