Sentyabrın 10-da Tələbə Qəbulu üzrə Dövlət komissiyası tələbələrin 2005-2005-cı dərs ilində orta və əsas təhsil bazasında orta ixtisas təhsil müəssisələrinə qəbulunun ikinci mərhələsini keçirəcək. TQDK-dan Trend ə verilən məlumata görə, qəbul Bakı, Sumqayıt, Naxçıvan, Gəncə, Lənkəran, Mingəçevir, Şəki və Göyçayda keçiriləcək.
İkinci mərhələdə texnikumlara orta təhsil bazasında (11 illik təhsil) 2 336 boş yerə 6 682 ərizə verilib. 1 saat 30 dəqiqə davam edəcək imtahan zamanı abituriyentlər iki fənn üzrə 40 suala cavab verməlidirlər. Bütün regionlarda imtahanlar eyni vaxtda - saat 12:00-da başlayır.
Əsas təhsil bazasında (9 illik təhsil) orta ixtisas təhsil müəssisələrinə 7 744 yerə 9 709 ərizə qəbul olunub. Sənəd vermiş abituriyentlər 1 saat 30 dəqiqə ərzində azərbaycan dili, azərbaycan tarixi və riyaziyyat fənləri üzrə 15 suala cavab verməlidirlər. Rus bölməsindən abituriyetlər "Ana dili" fənn bloku çərçivəsində rus dili ilə yanaşı azərbaycan dili fənnindən də imtahan verəcəklər.
Nəticələr imtahandan bir həftə sonra "Abituriyent" jurnalında nəşr olunacaq və TQDK-nın internet-saytında yerləşdiriləcək.
