Azərbaycan və Səudiyyə Ərəbistanı təhsil sahəsində saziş imzalayacaq. Azərbaycanın Təhsil Nazirliyindən Trend ə verilən məlumata görə, sənəd Səudiyyə Ərəbistanının ali təhsil naziri Həmid bin Məhəmməd Əl-Anqarinin Azərbaycana qarşıdakı səfəri zamanı imzalanacaq.
Sənədin Azərbaycan prezidentinin Səudiyyə Ərəbistanına səfəri zamanı imzalanacağı gözlənilirdi. Lakin daha sonra tərəflər bu məsələni nazirin Azərbaycana səfərinə kimi təxirə salmağı qərara alıb. Təhsil naziri Misir Mərdanov tərəfindən Əl-Anqarinin ölkəmizə dəvət olunması artıq Azərbaycanın Təhsil Nazirliyinin nümayəndələrinin bu yaxınlarda SƏ-yə səfəri zamanı nazirə çatdırılıb. Tərəflər təhsil sahəsində ikitərəfli əməkdaşlığın inkişafı ilə bağlı məsələləri müzakirə edib.
SƏ nazirinin oktyabra təyin olunmuş səfəri çərçivəsində diplomların qarşılıqlı qəbul olunması, elm və texnika sahəsində əməkdaşlığın perspektivləri, kadr, xüsusilə tələbə və müəllim mübadiləsi, Azərbaycan və Səudiyyə Ərəbistanının aparıcı universitetləri arasında birbaşa əlaqələrin qurulması məsələləri müzakirə olunacaq.
