Rusiyanın Gürcüstana tətbiq etdiyi iqtisadi embarqolarla bağlı Gürcüstanın azərbaycanlılar yaşayan Kvemo-Kartli bölgəsində iqtisadi-sosial böhran yaranıb. Bu barədə Trend ə Gürcüstan Azəbaycanlıları Milli Assambleyasının (GAMA) prezidenti Daşqın Gülməmmədov məlumat verib.
O, qeyd edib ki, Rusiya ilə Gürcüstan arasında münasibətlərin pisləşməsindən sonra qonşu ölkədə əhalinin vəziyyəti də gərginləşib. Belə ki, əvvəllər Rusiyadan gətirilən məhsullar indi dayandırıldığından Gürcüstanın Qardabani, Marneuli, Rüstavai şəhərlərində bir çox ərzaq məhsullarının qiməti 2 dəfədən 5 dəfəyə qədər bahalaşıb. Məsələn, un, düyü, makaron kimi məhsullar 4 dəfə bahalaşıb, yağ məhsulları 3 dəfə, kərə yağı 5 dəfə bahalanıb. Un qıtlığı üzündən çörək sexlərinin 20 faizinin fəaliyyəti dayanıb.
D.Gülməmmədovun sözlərinə görə, ərzaq məhsullarının qiymətinin bahalaşması və ərzaq qıtlığının yaranmasının səbəbi həm Rusiya ilə sərhədin bağlanması, həm də Gürcüstan hökumətinin yüksək gömrük tarifləri tətbiq etməsidir.
"Əvvəllər bir çox ərzaq məhsulları qeyri-qanuni vasitələrlə, qaçaqmalçılıq yoluyla Rusiyadan gətirilirdi. Artıq sərhəd bağlandığından bu məhsullar gətirilmir. Həm də səhəd keçid məntəqəsində yüksək gömrük tarifləri olduğundan, qanuni yolla Azərbaycandan, Rusiyadan olan xırda və orta sahibkarlar Gürcüstana məhsul aparılmasını dayandırıblar. Çünki Maliyyə Nazirliyinin müəyyən etdiyi yüksək gömrük tarifi biznesmenlər, məhsul sahibləri üçün əlverişli deyil"-deyə D.Gülməmmədov bildirib.
Onun sözlərinə görə, öz məhsullarını Gürcüstana daşıyan azərbaycanlı sahibkarlar "Qırmızı körpü" və "Laqodexi" sərhəd keçid məntəqələrində sıxışdırılırlar. D.Gülməmmədov bildirib ki, Gürcüstanda son günlərdə yaranmış sosial-iqtisadi böhrandan daha çox azərbaycanlılar əziyyət çəkir. Onun sözlərinə görə, sosial problemlərin aradan qaldırılması üçün hökumət tərəfindən Tbilisidə müəyyən tədbirlər görülür, lakin hökumətdə maliyyə problemləri olduğundan büdcədən ayılan dotasiyalar yetərli olmur.