Dünya Azərbaycanlıları Konqresi (DAK) 2007-ci ildə ilk tədbirini Ukraynanın Xarkov şəhərində keçirəcək. Bu barədə Trend ə DAK sədri Cavad Derəxti məlumat verib.
O bildirib ki, DAK Ukraynada böyük bir tədbir keçirməyi planlaşdırır. C.Derəxtinin sözlərinə görə, DAK-ın Ukrayna üzrə nümayəndəsi Oqtay Rüstəmov və digər fəallar bu işlərlə məşğuldur: "Gələn ilin əvvəlində, yanvar ayında bizim Ukraynada böyük bir tədbirimiz olacaq. Artıq hazırlıqlara başlamışıq. DAK həm də 2007-ci ili "Xocalı soyqrımı ili" elan edib. Bununla əlaqədar dünyanın bir çox ölkələrində tədbirlərimiz olacaq. Ümumiyyətlə, gələn il üçün çox sıx bir proqram tərtib etmişik"-deyə DAK sədri məlumat verib.
O, həmçinin qeyd edib ki, yaxın günlərdə DAK-ın Güney Azərbaycanın "21 Azər Hərəkatı" adı ilə tarixə düşmüş milli azadlıq hərəkatının ildönümüylə bağlı tədbirlər keçirəcək.
