Bu il mart ayında Bakıda Azərbaycan Respublikası Milli Televiziya və Radio Şurası ilə Türkiyənin Radio-Televizyon Üst Kurumu ilə əməkdaşlıq sazişi imzalanacaq. Bu barədə Trend agentliyinə Milli Televiziya və Radio Şurasının sədri Nuşirəvan Məhərrəmli məlumat verib.
O bildirib ki, hər iki ölkənin teleradio sahəsinə dair rəsmi qurumları arasında əldə olunmuş razılaşmaya əsasən, bu il mart ayında Türkiyədən geniş tərkibdə nümayəndə heyəti Azərbaycana səfərə gələcək. Səfər zamanı Bakıda ikitərəfli əməkdaşlığa dair saziş bağlanacaq. N.Məhərrəmlinin sözlərinə görə, sazişdə əməkdaşlığın bütün mümkün formaları həmçinin qarşılıqlı təcrübə mübadiləsi əksini tapacaq: "Türkiyənin teleradio sahəsindəki təcrübəsi ilə yaxından tanış olması üçün biz öz nümayəndələrimizi bu ölkəyə göndərəcəyik. Həmçinin bizim də qarşılıqlı cavab səfərimiz olacaq"-deyə N.Məhərrəmli bildirib.
O, Türkiyə telekanallarının Azərbaycanda peyk vasitəsilə yayımlanmasına dair Şuranın qərarının da dost ölkənin nümayəndələri ilə müzakirə edildiyini deyib. N.Məhərrəmlinin sözlərinə görə, Azərbaycanda televiziya yayımının dünya təcrübəsinə əsaslanaraq beynəlxalq standartlara uyğunlaşdırılmasına başlandığı Türkiyə tərəfinin diqqətinə çatdırılıb və onlar bunu anlayışla qarşılayıblar: "Rusiyanın, Türkiyənin, istənilən xarici ölkənin telekanallarının Azərbaycanda yayımı məsələsi barədə qəti qərarımız var və bu məsələ artıq bitib"-deyə Şura sədri vurğulayıb.
