Ümumrusiya Azərbaycanlıları Konqresinin (ÜAK) nümayəndələri Moskvaətrafı vilayətlərdə səfərdə olub, azərbaycanlılarla görüş keçiriblər. Bu barədə Trend ə ÜAK-ın Moskva şəhər təşkilatının sədri İlqar Hacıyev məlumat verib.
O bildirib ki, Moskvaətrafı ərazilərdə azərbaycanlıların sıx yaşadığı və çalışdığı yerlərdə, bazar və ticarət bazasında olublar. Azərbaycanlılarla görüşdə əsasən, soydaşlarımızın qeydiyyat problemləri, fəaliyyətlərinə məhdudiyyətlər qoyulub-qoyulmaması məsələləri ilə maraqlanıblar. İ.Hacıyevin sözlərinə görə, Moskva ətrafında yaşayan və işləyən azərbaycanlılardan deportasiya edilən olmayıb: "Miqrantların hüquqi statusu ilə bağlı yeni qanun çıxandan sonra ora bəzi bazar və mağazaların bağlanmasından yerli əhali də narazılıq edirdi. Çünki onlar bildirirdilər ki, bazarlarda çalışan azərbaycanlılar yerli əhalini meyvə-tərəvəzlə və çox az tapılan göy-göyərti ilə təmin edirlər. Onların fəaliyyətinin dayandırılması əhali üçün sərfəli deyil".