Azərbaycan, Bakı/ Trend müxbir E.Hüseynli/ Bu həftənin birinci yarısında Azərbaycan ərazisində hava şəraiti qeyri-sabit keçəcək, yağış, dağlıq və dağətəyi rayonlarda sulu qar, qar yağacağı proqnozlaşdırılır. Ekologiya və Təbii Sərvətlər Nazirliyinin (ETSN) Milli Hidrometeoroloji Departamentinin hidrometeoroloji proqnozlar bürosunun direktoru Umayra Tağıyeva bildirib ki, hesabat dövründə yağıntılar ayrı-ayrı ərazilərdə intensivləşəcək. Martın 6-7-də güclü şimal-qərb küləyi əsəcək. Temperatur 4-6 dərəcə düşəcək. Martın 8-də gündüz yağıntıların tədricən kəsiləcəyi, həftənin ikinci yarısında əsasən yağmursuz keçəcəyi gözlənilir. Həftənin sonunda isə temperatur tədricən yüksələcək.
Martın 6-7-də qeyri-sabit meteoroloji şərait diskomfort vəziyyəti yaratmaqla əsasən yuxarı tənəffüs orqanları xəstəlikləri üçün əlverişsiz olacaq. Martın 8-də biometeoroloji amillərin normal sutkalıq gedişi əksər insanlarda nisbətən rahatlıq hissi yaradacaq.
