Azərbaycan, Bakı / Trend müxbir S.İlhamqızı/ Türkdilli dövlətlərin ortaq televiziyasının yaradılması təşəbbüsü ilə bağlı Orta Asiya ölkələri hələ müsbət cavab verməyiblər. Bu barədə Trend ə Azərbaycan Milli Televiziya və Radio Şurasının sədri Nuşirəvan Məhərrəmli açıqlama verib.
Onun sözlərinə görə, Azərbaycan və Türkiyə bu işdə maraqlıdır və ortaq televiziyanın yaradılmasına razıdır. Lakin digər türkdilli respublikaların hələ ki, razılıqları yoxdur. Məhərrəmli deyib ki, türkdilli dövlətlərin vahid televiziyasının yaradılması çox mürəkkəb məsələdir və bunun detalları çox diqqətlə işlənib hazırlanmalıdır.
Məhərrəmli onu da deyib ki, Azərbaycanla Türkiyənin teleradio şuraları arasında bağlanmış əməkdaşlıq sazişi çərçivəsində bir sıra tədbirlər qarşılıqlı şəkildə razılaşdırılacaq, beynəlxalq qurumlarla birgə əməkdaşlıq ediləcək, ortaq televiziyanın yaradılması istiqamətində işlər görüləcək.
Teleradio Şurasının sədri onu da deyib ki, Rusiya telekanllarının Azərbaycanda yerli tezliklərdə yayımlanması üçün bu ölkə tərəfindən hökumətimizə bəzi təkliflər verilib, Türkiyədən isə hər hansı bir müraciət daxil olmayıb: "Rusiya tərəfi öz kanallarının yayımı ilə bağlı məsələni həll etmək üçün işçi qrup yaradılmasını təklif edib. Azərbaycanın Nazirlər Kabineti hansı qərara gələrsə, ona uyğun da addımlar atılacaq. Biz öz təkliflərimizi vermişik, hesab edirik ki, bütün xarici telekanalların yerli tezliklərdə yayımı dayandırılmalıdır".