Azərbaycan, Bakı, 28 aprel /Trend/
"Regional Medianın İnkişafına Yardım" (RMİY) İctimai Birliyi Azərbaycanın ümummilli lideri Heydər Əliyevin anadan olmasının 89-cu ildönümü münasibətilə Azərbaycanın müxtəlif regionlarında fəaliyyət göstərən media nümayəndələri arasında "Regional Media Kuboku" adlı futbol turniri keçirəcək.
Trend-in məlumatına görə, "Regional Media Kuboku"na 8 komanda qatılacaq. Turnirdə "RTV" (Xaçmaz), "CTV" (Lənkəran), "Kanal S" ( Şəki), "Türkel TV" (Tovuz), "Kəpəz", "Region TV" MMC və "RMİY" İB-nin komandaları mübarizə aparacaq. Yarışda iştirak edən bütün televiziyalarda "Regional Media Kuboku" haqqında video süjetlər, çap və elektron kütləvi informasiya vasitərlərində məlumatlar yerləşdiriləcək.
Futbol turnirinin hər il ümummilli liderin doğum günü ərəfəsində keçirilməsi planlaşdırılır. Yarışın keçirilməsində əsas məqsəd xalqımızın ümummilli lideri Heydər Əliyevin zəngin irsinin təbliğ olunması, onun Azərbaycan dövlətçiliyinin xilas olması, müstəqilliyimizin möhkəmləndirilməsi istiqamətində misilsiz xidmətlərinin ictimaiyyətə daha geniş
çatdırılmasına dəstək vermək, həmçinin regional media təmsilçiləri arasında əməkdaşlığı və həmrəyliyi möhkəmləndirməyə nail olmaq, eyni zamanda, son illərdə ölkəmizdə inkişaf etməkdə olan idman növlərindən biri olan futbolun kütləviləşdirilməsinə, bu idman növünə marağın daha da artırılmasına xidmət göstərməkdir.
Turnirin sonunda 1, 2 və 3-cü yeri tutmuş komandalar mükafatlandırılacaq.
Turnir Azərbaycan Futbol Federasiyaları Assosiasiyasının təşkilati dəstəyi ilə keçiriləcək.