Azərbaycan, Bakı, 11 dekabr /Trend, müxbir E.Mehdiyev/
Düşünürəm ki, Ermənistan Bakıda keçiriləcək Avropa Olimpiya Oyunlarında da iştirak edəcək. Bununla bağlı Azərbaycan tərəfindən heç bir problem yoxdur. Trend-in məlumatına görə, bunu çərşənbə axşamı keçirilən mətbuat konfransında Milli Olimpiya Komitəsinin (MOK) vitse-prezidenti Çingiz Hüseynzadə deyib.
"Ermənilər Romada Avropa Olimpiya Komitəsi Baş Assambleyasının iclasında ümumiyyətlə səsvermədə iştirak etməkdən imtina etdi. Bu o demək deyil ki, ermənilər iştirak edəcək və ya etməyəcək. Biz bütün komandaların iştirakına və təhlükəsizliyinə təminat vermişik", - Hüseynzadə bildirib.
MOK-un vitse-prezidenti qeyd edib ki, Avropa Olimpiya Oyunlarının yüksək səviyyədə təşkil edilməsi üçün Azərbaycanda bütün məsələlər Avropa qanunvericiliyinə uyğunlaşdırılmalı, yeni təhlükəsizlik sistemi qurulmalı, nəqliyyat sistemi yeniləşdirilməlidir.
"Bakıda bir sıra idman növlərindən idmançılar iştirak edəcək. Azərbaycanda bəzi idman növləri yoxdur və biz çalışacağıq ki, 2 il yarım müddətində bu idman növlərini Azərbaycanda yaradaq və inkişaf etdirək", - o deyib.
Qeyd edək ki, Avropa Olimpiya Komitəsi 2015-ci ildə birinci Avropa Olimpiya Oyunlarının Bakıda keçirilməsi ilə bağlı qərar qəbul edib.