Azərbaycan, Bakı, 17 yanvar /Trend/
Azərbaycanın ilk peşəkar velosiped komandası "Synergy Baku"nun 2014-cü ildə əməkdaşlıq edəcəyi brendin adı məlumdur.
Azərbaycan Velosiped İdmanı Federasiyası mətbuat xidmətindən Trend-ə verilən məlumata görə, əldə olunmuş razılığa əsasən, komanda üzvlərimiz 2014-cü ildə ABŞ-ın "Fuji" kompaniyasının "SST 1.1" tipli velosipedlərindən istifadə edəcəklər.
"Fuji"nin meneceri Miley Gelvez bildirib: "Synergy Baku" komandası ilə əməkdaşlıq etməkdən çox məmnunuq. Uzun illər Qərbi Avropa komandaları ilə əməkdaşlıq edən şirkət indi Asiyadan Avstraliyaya qədər olan bir coğrafiyanı əhatə edir. "Synergy Baku" isə şirkət üçün açılan yeni bir səhifədir. "Fuji SST" peşəkar velosipedçi üçün əla seçimdir. Modelin adı isə "Super Stiff Team", yəni "Super Möhkəm Komanda" anlamına gəlir ki, bu da sprinterə yarış zamanı özünü tam rahat hiss etməyə imkan verir. "Fuji SST" "Giro d"Italia" və "Vuelta" kimi çoxgünlük veloyürüşlərdə sınaqdan çıxmış bir modeldir. Bu üzdən də "Synergy Baku"nun velosipedlərimizdən istifadə etməsi bizi çox fərəhləndirir".
Qeyd edək ki, "Fuji SST" brendi komandamızın bəzi üzvlərinə artıq tanışdır. Məsələn, ötən il Matt Bremier bu şirkətin velosipedi ilə çempion sistemində çıxış edib, Markus Eybegger isə "Footon-Servetto"da mübarizə aparıb. Artıq komanda üzvlərinin ixtiyarında olan yeni velosipedi isə Patrik Leyn bazar günü Avstraliya Milli Çempionatında sınaqdan keçirib.
P.Leyn deyib: "Bu qeyri-adi bir velosipeddir. Ümid edirəm ki, "Fuji SST"-nin sayəsində bu il bizim qələbələrimiz çox olacaq".
Velosipedlərdən başqa, "Fuji" şirkəti "Synergy Baku"nu "Bont Cycling" (ayaqqabı), "Schwalbe" (velosiped şini), "HED Cycling" (təkər) və "SMS Santini" (idman geyimi) ilə də təhciz edəcək.
