Bakı. Trend:
Azərbaycanın yunan-Roma güləşi üzrə U-17 millisi Bolqarıstanın Samokov şəhərində keçirilən Avropa çempionatında növbəti medallarını əldə edib.
Trend-in məlumatına görə, 48 kq çəki dərəcəsində çıxış edən Ömər Salmanov final qarşılaşmasında rusiyalı Artyom Tkaçenko ilə üz-üzə gəlib. Güləşçimiz rəqibinə 1:5 hesabı ilə uduzaraq Avropa çempionatının gümüş medalına sahib çıxıb.
55 kq çəki dərəcəsində mübarizə aparan Qurban Məcnunov da finalda rusiyalı Edem Payziyevə minimal fərqlə – 1:2 hesabı ilə məğlub olub və yarışı gümüş medalla başa vurub.
65 kq-da yarışan Orxan Həbibli isə əvvəlcə təsəlliverici görüşdə yunanıstanlı Dionisios Bulutidisi məğlub edib. O, bürünc medal uğrunda qarşılaşmada ukraynalı Oleksandr Venetsi 9:0 hesabı ilə üstələyərək üçüncü yeri tutub.
Beləliklə, Azərbaycan millisi yarışın ikinci gününü 2 gümüş və 1 bürünc medalla tamamlayıb.
