Bakı. Trend:
Azərbaycanın Ukraynadakı fövqəladə və səlahiyyətli səfiri Azər Xudiyev Kiyev şəhər Dövlət Administrasiyasının rəhbəri Vitali Kliçko ilə görüşüb.
Azərbaycanın Ukraynadakı səfirliyindən Trend-ə verilən məlumata görə, görüş zamanı bəzi Azərbaycan şirkətlərinin Kiyevdə üzləşdiyi çətinliklərin aradan qaldırılması və onlara müvafiq dəstəyin verilməsi məsələləri müzakirə edilib. Bildirilib ki, Azərbaycan şirkətlərinin Ukraynanın paytaxtında mühüm infrastruktur layihələrdə iştirakı üçün ayrıca Kiyev şəhər meri Vitali Kliçko ilə görüşü vacibdir.
Kiyev meri qeyd edib ki, Ukrayna yolların bərpası və müasir infrastrukturun tikintisi baxımından ən yaxşı təcrübəni qəbul etməyə hazırdır. Qeyd edib ki, Azərbaycan şirkətləri artıq paytaxtda yol tikintisi sahəsində çalışırlar. Bu tərəfdaşlıq daha səmərəli və qarşılıqlı faydalı hala gətirilməlidir.
Səfir A.Xudiyev bildirib ki, çoxlu sayda Azərbaycan şirkəti Kiyevdə müxtəlif sahələrdə işləməyə hazırdır. Azərbaycan şirkətlərinin Kiyevdə layihələrə maliyyə yatırımını artırması üçün birgə əməkdaşlığın gücləndirilməsi zəruridir.
Görüşdə, həmçinin Azərbaycan xalqının çoxəsrlik ənənələrə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin heykəlinin ucaldılması üçün görüləcək işlər, müvafiq sənədləşmə işləri, eskiz layihələrinin razılaşdırılması müzakirə edilib.