Almatı. Trend:
Avrasiya İnkişaf Bankının (AİB) Almatıda keçirilən biznes forumu çərçivəsində "Mərkəzi Asiyada İslam Maliyyəsi" mövzusunda birinci sessiyası keçirilib.
Trend-in müxbiri xəbər verir ki, sessiyada iştirakçılar Mərkəzi Asiya dövlətlərində maliyyə layihələrinin təməl prinsiplərini müzakirə edib, yanaşı problemləri və onların həll mexanizmlərini nəzərdən keçirib.
Spikerlərin məruzə və çıxışlarının mövzusu İslam bankçılığı və maliyyəsinin inkişafına qanunvericiliyin və dövlət tənzimlənməsinin təsiri olub.
Qeyd edək ki, qlobal bank aktivlərində İslam maliyyəsi seqmenti, 2024-cü ilin əvvəlinə olan məlumatlara görə, 2 faiz təşkil edir, lakin bu, artıq 4 trilyon ABŞ dollarıdır və sürətlə artmaqdadır. Beləliklə, 2015-2021-ci illər ərzində dünyada İslam aktivlərinin həcminin orta illik artımı ənənəvi maliyyə aktivləri arasında 5,8 faizlə müqayisədə 10,5 faiz təşkil edib.
İslam bankları hazırda dünyanın 40-dan çox ölkəsində dayanıqlı mövqelər tutub və klassik kredit təşkilatları ilə effektiv rəqabət aparmağa başlayıb.
AİB İslam maliyyəsi istiqamətinin inkişafına 2023-cü ildə başlayıb, İslam İnkişaf Bankının dəstəyi ilə İslam maliyyəsi prinsiplərinə uyğun olaraq maliyyələşdirmənin təmin edilməsi üçün xüsusi "İslam pəncərəsi" yaradılır. AİB regional inkişaf bankı kimi Mərkəzi Asiyada İslam investisiyaları üçün "bələdçi" və regional tərəfdaş olaraq çıxış etməyi planlaşdırır.
(Tərcümə: Rəna Əbdürəhmanova)
