Kənd Təsərrüfatı Nazirliyi Bakıda keçirilən kənd təsərrüfatı məhsulları yarmarkalarında təxminən 24 min ton məhsul reallaşdırıb
Azərbaycan, Bakı / Trend müxbir S.Babayeva/ Azərbaycanın Kənd Təsərrüfatı Nazirliyindən çərşənbə günü verilən məlumata görə, bu günə qədər Bakıda keçirilən 130 kənd təsərrüfatı məhsulları yarmarkasında 24 min ton məhsul reallaşıb. Reallaşan məhsulun ümumi həcminin 1365,2 tonu ət məhsulları, 613,1 tonu süd məhsulları, 573,4 tonu konservləşdirilmiş məhsullar, 9581,3 tonu tərəvəz, 3389,6 tonu kartof, 2513,2 tonu bostan bitkiləri, 491,3 tonu taxıl məhsulları, 4936,8 tonu meyvələrin payına düşür. Həmçinin Naxçıvan Muxtar Respublikasında 208,4 ton ərzaq məhsulları satılıb.
Nazirlikdən verilən məlumata görə, Ramazan bayramı ilə əlaqədar olaraq məhsulların gətirildiyi regionlarla satışın həcminin genişləndirilməsi ilə bağlı danışqlar aparılır.
"Biz tərəvəzlərin həcmini genişləndirmək, bazarda həmçinin balıq məhsulları təqdim etmək niyyətindəyik" - deyə nazirlikdən bildiriblər.
Bakıda kənd təsərrüfatı məhsullarının yarmarkası 2006-cı ilin iyulundan keçirilir, nazirlikdə hesab edirlər ki, yarmarkalar istehsalçılara heç bir maneə olmadan öz məhsullarını bazara çıxarmaq imkanı verir. "Nəticədə əhali münasib qiymətlərlə keyfiyyətli məhsul əldə edir (bütün məhsullar ekspertizadan keçir) - deyə nazirlikdən bildiriblər.
Yarmarka Bakının yeddi rayonunda, Suraxanı, Nərimanov, Yasamal, Xətai, Nizami, Binəqədi və Nəsimi rayonlarının ərazisində hər şənbə və bazar günləri keçirilir
