Azərbaycan, Bakı / Trend , müxbir S.Babayeva/ Azərbaycanın iri quşçuluq müəssisələri tərəfindən idxal olunan yemin qiymətinin qalxması hər cümə günü paytaxda keçirilən xüsusi yarmarkalarda quş məhsullarının həcmini kəskin şəkildə aşağı salıb. Bu barədə bazar ertəsi Respublika Quşçuluq Cəmiyyətinin sədri Aydın Vəliyev məlumat verib.
"Müəssisələr istehsalı aşağı salıb və nəticədə, quşçuluq müəssislərinin yarmarkalara çıxardıqları məhsulun həcmi də azalıb" - deyə Cəmiyyətin pəhbəri bildirib.
Vəliyevin sözlərinə görə, əgər əvvəllər hər həftə yarmarkaya 20-25 ton quş əti gətirilirdisə, ötən həftə bu göstərici cəmi 10 ton təşkil edib. Vəliyev hesab edir ki, ölkədə quş məhsullarının istehsalının stimullaşdırılması ilə bağlı tədbirlər görülməzsə, bu həcm azalmaqda davam edəcək.
Bu günədək Bakıda keçirilən quş əti yarmarkalarında 400 min tondan çox quş əti və 8 mln.dan çox yumurta satılıb. Quş əti məhsulları yarmarkası 2006-cı ilin dekabr ayından keçirilir.
Quşçular Cəmiyyətinə "Hovsan Broyler", "Mardakan Broyler", "Siyazan Broyler", "Devechi Broyler" , ümimilikdə, 28 müəssisə daxildir.
