Azərbaycan, Bakı/ Trend , müxbir İ.Xəlilova/ Dünya Bankı ümid edir ki, yaxın gələcəkdə Azərbaycan Beynəlxalq İnkişaf Assosiasiyasının (BİA) donoruna çevriləcək. BİA 2008-ci il maliyyə ilində Azərbaycanda güzəştli şərtlərlə layihələrin maliyyələşdirməsini dayandıracaq. Bu barədə çərşənbə günü Bakıya səfərinin nəticələrinə həsr edilən mətbuat konfrasında Bankın Mərkəzi Asiya və Avropa üzrə vitse-prezidenti Şiqeo Katsu məlumat verib. "Bu, Azərbaycanın kasıb ölkələr kateqoriyasından çıxarılması və orta gəlirli ölkələr qrupuna daxil edilməsi deməkdir. Mən hesab edirəm ki, bu istiqamətdə fəaliyyət Azərbaycanın stabil və davamlı inkişafına gətirib çıxaracaq" -vitse-prezident hesab edir. Müvafiq olaraq, 2008-ci ilin sonunadək hökumət təxminən 130 mln. dollar müəyyən edilən BİA kreditlərinin sonuncu kvotasını istifadə etməlidir. Bu vəsait biri üzrə qarışıq kredit (su layihəsi) təqdim edilən yeddi layihənin maliyyələşdirməsinə yönəldilməlidir. Layihələr növbəti ilin sonunadək bankın Direktorlar Şurasında təsdiq edilməlidir.Ayrılan kvotadan hazırda reallaşdırılan "Məcburi köçkünlərin sosial inkişafı" və "Azərbaycan kənd investisiyaları" layihələrinin davam etdirilməsi üçün əlavə vəsaitlərin ayrılması nəzərdə tutulur. Güzəştli kreditlər su təchizatı və kanalizasiya sisteminin inkişafı, pensiya, təhsil sistemində islahatlar proqramı üzrə fazaların reallaşdırılmasına təqdim ediləcək. Daha iki kredit "Azərbaycan maliyyə sisteminin müasirləşdirilməsi" və "Azərbaycanın dövlət və korporativ sektorunda hesabatlılıq layihəsi" (CAPSAP) yeni layihələrə ayrılacaq. Bankın vitse-prezidenti hesab edir ki, bütün bu layihələr müxtəlif hazırlıq mərhələsindədir, lakin layihələrin 2008-ci il maliyyə ilində təsdiqlənməsi ehtimalı böyükdür. Artıq iki ildir ki, ölkə DB-dan BİA və Beynəlxalq Yenidənqurma və İnkişaf Bankı xətti ilə qarışıq kreditlər alır. BİA-nın vəsaitləri, əsasən, texniki köməyin xüsusi çəkisinin yüksək olduğu dövlət administrasiya sisteminin təkmilləşdirilməsi, sosial sektordakı layihələr və biliklərin artırılmasını tələb edən layihələr üçün nəzərdə tutulub. BİA-ya üzv ölkələrin rəyinə görə, 2007-ci il maliyyə ilində Azərbaycan üçün güzəştli kreditlərin həcmi 79.4 mln. dollar nəzərdə tutulub. Lakin hökumət bu vəsaitləri tam mənimsəyə bilməyib. DB-nın Azərbaycan hökuməti ilə tərəfdaşlıq strategiyasına əsasən (2007-2010-cu illər), BYİB xətti üzrə portfelin həcmini 659 mln. dollara çatdırmaq gözlənilir. Bununla yanaşı, portfelin 2008-ci ildə 257, 2009-cu ilə 442 mln. dollara qədər artırılması gözlənilir. BİA kreditləri portfelini 2006-cı ilin nəticələri üzrə 2010-cu ildə 557 mln. dollardan 804 mln. dollaradək artırmaq planlaşdırılır. Lakin BİA xətti üzrə Azərbaycana yardımların dayandırılması ilə əlaqədar olaraq, portfel 680 mln. dollara çatdırıla bilər. DB Direktorlar Şurasında 2006-cı il dekabrın 7-də təsdiqlənən yeni strategiyanın ümumi dəyəri 1.260 mln. dollardır.
...
