Azərbaycan, Bakı / Trend , müxbir İ.Xəlilova / Dövlət Statistika Komitəsinin məlumatında bildirilir ki, yanvar-noyabr aylarının yekunlarına görə, Azərbaycanda orta aylıq əmək haqqının həcmi 199 manat təşkil edib ki, bu göstərici ötən ilin analoji dövrünün göstəricisindən 41,7% çoxdur.
Ən yüksək əmək haqqı hasilat sənayesində, maliyyə fəaliyyəti sahəsində, daşınmaz əmlakla aparılan əməliyyatlar sahəsində, icarə və istehlakçılara xidmət, eləcə də, tikinti sahəsində qeydə alınıb.
Göstərilən dövr ərzində orta aylıq əmək haqqı bir ay ərzində adambaşına düşən orta pul gəlirlərindən 49,8% çox olub.
Dekabrın 1-nə adambaşına düşən nominal gəlirlər 1461,6 manat təşkil edib ki, bu da 2006-cı ilin yanvar-noyabr ayının göstəricisindən 38,1% çoxdur. Adambaşına real pul gəlirləri 1305,4 manat təşkil edib.
Yanvar-noyabr ayları ərzində Azərbaycan əhalisinin nominall pul gəlirləri 12360,0 mln. manat təşkil edib ki, bu göstərici ötən ilin analoji dövrünün göstəricisindən 39,7% çoxdur. Real pul gəlirləri isə, bu dövr ərzində 11039,5 mln. manata çatıb ki, bu göstərici ötən ilin analoji dövrünün göstəricisindən 41,3% çoxdur.
11 ay ərzində əhali mal və xidmətlərin əldə edilməsinə şəxsi gəlirlərinin 64,1%-ni, vergi ödənişlərinin, sosial sığortanın və icbari üzvlük haqlarının ödənilməsinə 10,7%-ni, kapitalın yığımına və əldə edilməsinə isə, 25,2%-ni yönəldib.