Azərbaycan, Bakı/ Trend , müxbir İ.Xəlilova, S.Əliyev/ Azərbaycanın Tarif Şurası radioaktiv materialların hər 1 km daşınması üçün xidmətlərin tarifləri 3,5 manat müəyyən edib. Bu barədə çərşənbə axşamı İqtisadi İnkişaf Nazirliyindən bildiriblər. Dövlət təsərrüfat subyektləri tərəfindən belə materialların saxlanması və basdırılması tarifləri isə, uyğun olaraq, 85 manat və 80 manat səviyyəsində müəyyən edilib. Bu tariflər ilk dəfə olaraq Fövqəladə Hallar Nazirliyinin təklifi əsasında tətbiq edilib. Tarif Şurasının qərarı ilə Dövlət Gömrük Komitəsinin Mərkəzi Laboratoriyası tərəfindən göstərilən 30-a yaxın pullu xidmət üzrə tariflər də təsdiq edilib və bu xidmətlərin tarifləri 8 -110 manat arasında dəyişməklə müəyyənləşdirilib. İclasda, Rabitə və İnformasiya Texnologiyaları Nazirliyinin təklifi əsasında "Radiotezliklərin qeydiyyatı, elektromaqnit uzlaşmasının təmini və istismarına nəzarət tarifləri" bölməsində redaktə xarakterli dəyişiklik edilib. Radioaktiv materialların daşınması, saxlanması və basdırılması üzrə pullu xidmətlərin tarifləri təsdiq olunduğu gündən, digər tariflər isə 2008-ci il yanvarın 1-dən tətbiq ediləcək.
...