Azərbaycan, Gəncə, 28 aprel / Trend , müxbir V.Məmmədov/ Azərbaycan Kənd Təsərrüfatı Nazirliyi balansında olan Kənd Təsərrüfatı Akademiyasına tələbə qəbulu zamanı güzəştlərin tətbiq edilməsi edilməsi xahişi ilə Tələbə Qəbulu üzrə Dövlət Komissiyasına müraciət edəcək. Bu barədə bazar ertəsi jurnalistlərə kənd təsərrüfatı nazirinin müavini Aslan Aslanov məlumat verib.
Azərbaycanda kənd təsərrüfatı naziri İsmət Abbasov bir neçə dəfə jurnalistlərə açıqlamasında kənd təsərrüfatı sahəsində mütəxəssislərin çatışmadığını qeyd edib.
Azərbaycanda kənd təsərrüfatı sahəsində yeganə mütəxəssis hazırlayan Gəncə Kənd Təsərrüfatı Akademiyasında 1200-ə yaxın tələbə oxuyur. Nazirlik hesab edir ki, akademiyaya qəbul edilən şəxslərin sayı artmalıdır.
Aslanov bildirib ki, müraciətin edilməsində məqsəd təhsil ocağında tələbələrin sayını artırmaq və aqrar sahədə kadrların hazırlanması işinin təşkilidir. "Zootexnika və baytarlıq sahəsində kadrların yaş həddi 60-dan yuxarıdır. Belə getsə, bir neçə ildən sonra bu sahədə mütəxəssis çatışmazlığı yaranacaq", - nazir müavini bildirib. Aslanov bildirib ki, müraciətdə Kənd Təsərrüfatı Akademiyasına qəbul balının aşağı salınması əks olunub.
Aslanov həmçinin akademiyada bir neçə yeni ixtisasın açılmasına ehtiyac olduğunu da vurğulayıb.
Müəlliflə əlaqə saxlamaq üçün elektron ünvan: [email protected]
