Azərbaycan, Bakı, 01 may / Trend , müxbir İ.Xəlilova/ Azərbaycan Beynəlxalq Bankı mayın 1-dən American Express beynəxalq ödəmə sistemi kartlarının dövriyyəyə buraxılmasına başlayıb. Bank bu ödəmə sisteminin Azərbaycandakı eksklüziv tərəfdaşı seçilib. Bu barədə cümə axşamı ABB İdarə Heyətinin sədr müavini Rövşən Kərimov, kartların təqdimat mərasimində bildirib. Bank beş il ərzində 135 min American Express kartı buraxmaq niyyətindədir. Kartlar manatla buraxılacaqlar.
Kart sahiblərinin maliyyə vəziyyəti, onun kredit tarixi və ödəmə qabiliyyətliliyinə müvafiq olaraq, kredit limitləri açılacaq. Kərimovun sözlərinə görə, ABB birinci mərhələdə 1 min manat kredit limitinə malik Green Card və 3 min manat limitə malik Gold Card buraxmaq niyyətindədir. Kart sahibları 45 gün güzəştli dövr ərzində faizləri ödəmədən kredit limitlərindən istifadə edə biləcəklər. Green Card üzrə göstərilən illik xidmətin dəyəri 60, Gold Card üzrə isə, 150 manat təşkil edəcək.
Bu kartların sahibləri həm ölkə daxilində, həm də onun sərhədlərindən kənarda bonus və güzəştlərə çıxış alacaqlar. Ödəmə sisteminin vitse-prezidenti Tristan Kirçnerin sözlərinə görə, American Express kartları dünyanın 200 ölkəsində qəbul ediləcək. Bu kartlar vasitəsilə alınan malların itirilməsi və ya zədələnməsi zamanı, 90 gün ərzində genişləndirilmiş sığorta paketi - səyahət zamanı sahibin və ya onun ailə üzvləri üçün bədbəxt hallardan sığorta, baqaj və ya uçuşun ləngiməsi hallarında yeni geyimin və yeməyin alınmasına sığorta təqdim edilir.
American Express-in vitse-prezidenti onu da qeyd edib ki, ABB Azərbaycanda bu ödəmə sisteminin kartlarının buraxılması üçün eksklüziv hüquqa malik olan yeganə bank olacaq. Belə ki, bu onun ödəmə sistemi strategiyasına uyğundur.
Azərbaycan Beynəlxalq Bankı 1997-ci ildən kartlar buraxır və bu gün 1,6 mln. karta malikdir. Bank vəsaitlərin nəqd pula çevrilməsi üçün respublika üzrə quraşdırılmış ATM-in 47 faizini təşkil edən 578 bankomat, 2500 POS-terminal (55 faiz) və 65 məlumat köşkü quraşdırıb.
Mayın 1-ə olan rəsmi məzənnə - 0,828 AZN/USD
Müəlliflə əlaqə saxlamaq üçün elektron ünvan: [email protected]
