Azərbaycan, Bakı, 08 may/ Trend , müxbir İ.Xəlilova/ "Azərbaycan İnvestisiya Şirkəti" (AİŞ) Səhmdar Cəmiyyəti mayın sonunadək "MKT İstehsal Kommersiya" MMC-dən iplik parçalar, trikotaj istehsalının təşkili, həmçinin, "Sumqayıt xovlu iplik" fabrikinin yenidən qurulması layihəsi üzər biznes-planın alınmasını gözləyir. Bu barədə AİŞ icraçı direktorunun müavini Riad Qasımov məlumat verib.
"Bu bizim üçün çox maraqlı layihədir və biznes-plan əsasında genişlənmək niyyətində olan baş şirkətdə - MKT-nin kapitalında 20 faiz iştirak payı almaq niyyətindəyik", - Qasımov qeyd edib.
Onun sözlərinə görə, layihədə zavodun, kommersiya daşınmaz əmlakın tikintisi də daxil olmaqla bir neçə istiqamət nəzərdən keçirilir, eləcədə toxuculuq fabrikinin tikintisi nəzərdə tutulur.
"Şirkət çox illərdir ki bazardadır və bu layihə əlavə investisiyalar cəlb etməyə imkan verəcək perspektivli layihələrdən biri olacaq", - AİŞ direktorunun müavini hesab edir.
Hazırda AİŞ MKT ilə danışıqlar aparır, zərurət yarandığı halda, əlavə maliyyələşdirilməyə investisiya şirkəti və Özəl Sektorun İnkişafı İslam Korporasiyası tərəfindən təsis edilən Caspian International Investment Company-ni (CIIC) cəlb etmək mümkündür.
"CIIC-in vəsaitlərinin cəlb edilməsi ilə bağlı problem olmayacaq. Lakin, ən başlıcası, MKT-nin arzusu və kifayət qədər yüksək səviyyədə hazırlanmış sənədin olmasıdır", - Qasımov qeyd edib.
Sumqayıt trikotaj fabriki MKT tərəfindən 2006-cı ildə özəlləşdirilib.
Mayın 8-ə olan rəsmi məzənnə - 0,8292 AZN/USD.
Müəlliflə əlaqə saxlamaq üçün elektron ünvan: [email protected]
