Azərbaycan, Bakı, 16 may/ Trend , müxbir İ.Xəlilova/ Azərbaycan hökuməti ilə maliyyə sektorunun müasirləşdirilməsinə texniki yardım layihəsi üzrə danışıqlar növbəti həftə başa çatmalıdır və bu, layihənin iyunun 27-28-də Dünya Bankının Direktorlar Şurasında təsdiqlənməsinə imkan yaradacaq. Bu barədə cümə günü DB Bakı nümayəndəliyinin rəhbəri Qreqori Yeceyçak məlumat verib.
Layihə üzrə danışıqlar mayın 6 -da başlayıb. Lakin Maliyyə Nazirliyi Milli Bank üzrə komponentin layihədən çıxarılmasını zəruri hesab edərək, danışıqları dayandırıb. Danışıqlar yenidən bərpa edilib, lakin yekun qərar hələ qəbul edilməyib.
"Hökumət layihənin komponentlərini razılaşdırmağa davam edir. Danışıqları bir neçə gün ərzində bitirmək vacibdir, - Yeceyçak bildirib. Layihənin dəyəri çox böyük olmasa da, burada qarşıya qoyulan vəzifələr maliyyə sektorunun inkişafı üçün çox vacibdir".
Layihənin ümumi dəyəri $11 milyondur (2008-ci ildən beynəlxalq kreditlər çərçivəsində işlər, xidmətlər və mallara münasibətdə tətbiq edilmiş ƏDV-siz) və bunun $10 mln.-u DB-nin kreditinin payına düşür.
Kredit Beynəlxalq İnkişaf Assosiasiyası xətti üzrə (möhlət müddəti 10 il olmaqla, 35 il müddətinə, illik 075 faiz dərəcə ilə), ölkə üçün sonuncu güzəştli kredit kvotası çərçivəsində ayrılacaq.
Layihə nizamlayıcı və nəzarət rejiminin gücləndirilməsi ilə Azərbaycanın maliyyə bölməsinin sürətli inkişaf nəticəsində meydana çıxan sistemli risklərin qarşısının alınması, çıxış və əsas maliyyə əməliyyatlarının şəffaflığının yaxşılaşdırılmasına yönəlib.
Layihə çərçivəsində işlər beş əsas bölmədə islahatların aparılması ilə maliyyə sektorunun davamlı inkişafını dəstəkləyəcəklər:
- şirkətlərin yerli bazara daha böyük çıxışı üçün bazarda nizamlayıcı və nəzarət rejiminin yaxşılaşdırılması;
- maliyyə xidmətləri istehlakçılarının hüquqlarının müdafiəsinin gücləndirilməsi;
- İnternet şəbəkəsi vasitəsilə Azərbaycan Milli Bankının maliyyə məlumatlarına çıxışın və şəffaflığın yaxşılaşdırılması;
- kredit bürosunda mövcud Mərkəzləşdirilmiş kredit reyestrinin yenilənməsi, reyestrin on-line rejimdə işinin təmin edilməsi, istehlakçı və müəssisələr üçün kredit tarixlərinin aparılması;
- kənd təsərrüfatı məhsulları istehsalçıları ilə iş üçün bank və bank olmayan kreditorların tədris proqramları ilə təmin edilməsi.
İsveçrənin iqtisadi əlaqələr üzrə Dövlət Katibliyi Seco maliyyə xidmətləri istehlakçılarının hüquqlarının müdafiəsi üzrə komponentin hazırlanmasını maliyyələşdirməyə razılaşıb.
Bu ölkənin maliyyə bölməsi üçün DB-nin üçüncü və güzəştli şərtlərlə sonuncu krediti olacaq. Dünya Bankı Azərbaycanın maliyyə bölməsinə texniki yardımın göstərilməsi (FSTA) üçün artıq $5,4 mln., maliyyə xidmətlərinin inkişafına isə $12 mln. ayırıb.
Mayın 16-a olan rəsmi məzənnə - 0,8274 AZN/USD.
Müəlliflə əlaqə saxlamaq üçün elektron ünvan: [email protected]