Azərbaycan, Bakı, 30 may /Trend Cap , müxbir İ.Xəlilova/ Gürcüstanın ən iri bankı - Bank Of Georgia iştirak payının alınmasına dair Azərbaycan bankları ilə danışıqlara başlayıb. Bu barədə cümə günü Bank Of Georgia-nın bank riteyli üzrə Departamentinin Bakıda olan rəhbəri Konstantin Sereteli məlumat verib.
"Azərbaycanın bank bazarına daxil olmaq üzrə iki variant işlənilir - mövcud Azərbaycan bankında iştirak payı və ya yeni törəmə bankın açılması üçün lisenziya almaq, - Sereteli qeyd edib. Azərbaycanda iştirakın strategiyası və məsələləri yerli banklarla və ölkənin Milli Bankı ilə müzakirə olunur".
O, danışıqların aparıldığı bankların adlarını açıqlamaqdan imtina edib. Onun rəyinə görə,danışıqların başa çatması müddəti hər iki tərəfin hazırlığından və maraqlarından asılıdır.
Seretelinin sözlərinə görə, Bank of Georgia Azərbaycan bazarına fiziki və hüquqi şəxslərə göstərilən bütün xidmətləri təklif etməyə hazırdır. Bank bu gün Gürcüstanda pərakəndə bank xidmətlərini fəal şəkildə inkişaf etdirir ki, bu xidmətlər Azərbaycana da təklif edilə bilər.
Azərbaycan bankında iştirak payına dair məsələ hələ müzakirə edilməsə də, Bank Of Georgia-nın MDB ölkələrinin bank bazarında mövcud iştirak təcrübəsinə əsasən, o, 75 faizdən 100 faizədək səhm alıb. Bu gün bank Ukraynada 100 fazilik səhmdar kimi çıxış edir, Belarusda isə, yerli bankın səhmlərinin 75 faizinə malikdir.
Bank Of Georgia bu günə 2 mlrd. laridən (bir dolların cari məzənnəsi 1,45 laridir) çox aktivə malikdir. Bankın kapitallaşması $700 mln. təşkil edir ki, Seretelinin sözlərinə görə, bu, bankın dinamik inkişafı və onun səhmlərinə tələbatın olması üçün ən yaxşı göstəricidir. Hazırda Gürcüstan bankının səhmləri London birjasında qiymətləndirilir.
Bankın səhmdarları strukturunda kapitalda 85 faiz səhmin sahibləri kimi xarici institusional fondlar çıxış edirlər və Seretelinin rəyinə görə, bu, MDB ölkələri üçün presedentsiz haldır. Portfel kifayət qədər diverfisikasiya edilib və hər Fond maksimum 5-10 faiz səhmə malikdir. Qalan 15 faiz səhm bankın menecmentinə məxsusdur. Bank Of Georgia-nın Gürcüstan bazarında payı aktivlər üzrə 33 faiz təşkil edir, digər bank göstəriciləri üzrə isə, 30 faizədən 35 faizədək dəyişir.
Mayın 30-a olan rəsmi məzənnə - 0,8248 AZN/USD.
Müəlliflə əlaqə saxlamaq üçün elektron ünvan: cap
