Azərbaycan, Bakı, 04 iyun / Trend , müxbir S.Babayeva/ Çərşənbə günü Bakıda öz işinə başlayan standartlaşdırma, metrologiya və patent üzrə dövlətlərarası Şuranın 33-cü iclasında təxminən 70 dövlətlərarası standart qəbul olunacaq. Bu barədə Azərbaycanın Standartlaşdırma üzrə Dövlət Agentliyinin Baş direktoru, iclasın sədri Ramiz Həsənov məlumat verib.
"Heç bir standart Azərbaycan tərəfindən təqdim olunmayıb, onlar yalnız ölkəmizin iştirakı ilə hazırlanıb", - deyə agentlik rəhbəri bildirib.
Həsənovun sözlərinə görə, bu standartlar qida sənayesi, metallurgiya, neft kimya sahələrinə aiddir.
Onun sözlərinə görə, iclasın gündəliyinə təxminən 60 məsələ daxildir. Bura texniki nizamlanma, standartlaşdırma, metrologiya, akkreditasiya, texniki reqlament, norma, qayda və digər aktual məsələlərin yerinə yetirilməsi üzərində nəzatət aiddir.
İki günlük iclas Azərbaycan, Belarus, Gürcüstan, Qazaxıstan, Qırğızstan, Tacikistan, Moldova, Özbəkistan, Rusiya, Ukrayna və bir sıra beynəlxalq təşkilatların nümayəndə heyətlərinin iştirakı ilə keçirilir.
Ötən ilin oktyabr ayında Bişkekdə keçirilən iclas Azərbaycan, Ermənistan, Belarus, Gürcüstan, Qazaxıstan, Qırğızstan, Rusiya, Tacikistan, Özbəkistan, Ukrayna, MDB İcraiyyə Komitəsi, Dövlətlərarası Şura nümayəndələrinin iştirakı ilə keçirilmişdi.
İclas MDB-nin gələcək inkişaf Konsepsiyasının müddəaları nəzərə alınmaqla, 2015-ci ilədək dövr ərzində Strateji plan layihəsinin hazırlanması barədə qərar qəbul edib. Ümumilikdə 39 dövlətlərarası normativ sənədlər və onlara dəyişikliklər, 98 dövlətlərarası standart, qaz kalometriyası sahəsində qaz yanacağı, həmiçinin, yanacağın tətbiq edilən digər növlərinin kaloriliyinin metroloji təminat sisteminin yaradılması üzrə iş proqramı qəbul edilib. İclasın qərarı ilə MDB iştirakçı dövlətlərinin nəzarət orqanları tərəfindən aşkar olunan təhlükəli məhsullar barədə avtomatlaşdırılmış dövlətlərarası operativ informasiya mübadiləsi sistemi tətbiq edilib və MDB iştirakçı dövlətləri ərazilərində istesal olunan və reallaşdırılan oyuncaqların keyfiyyəti və təhlükəsizliyi üzrə yoxlamaların aparılması üçün texniki tapşırıq və akreditasiya üzrə qarşılıqlı fəaliyyət Proqramı təsdiq edilib.
