Azərbaycan, Bakı, 06 iyun/ Trend , müxbir İ.Xəlilova/ Azərbaycan Milli Bankının İdarə Heyəti Mərkəzləşdirilmiş Kredit Reyestrinin (MKR) gələcək inkişaf strategiyasının müzakirəsinə hazırlaşır. AMB-nin Statistika və Araşdırmalar Departamentinin direktoru Emin Hüseynov bildirib ki, ABŞ-ın Beynəlxalq İnkişaf Agentliyi (USAİD) reyestrinin işinin təkmilləşdirilməsində Milli Banka yardım göstərir.
"Bu gün USAİD-in reyestrinin etibarlılığının artırılması, analitik qabiliyyətinin genişləndirilməsinə dair tövsiyələri təqribən 95 faiz yerinə yetirilib", - Hüseynov qeyd edib.
Gələcəkdə kredit reyestrinə bankların debitor borclarının qiymətləndirilməsi, risklər üzərində bank nəzarətinin təkmilləşdirilməsi imkanları veriləcək və bunun üçün risklərin idarə edilməsinə dair əlavə məlumat toplanılacaq.
"Kredit bürosu haqqında" hazırlanmaqda olan qanun layihəsinə müvafiq olaraq, MKR-i, dünya təcrübəsində olduğu kimi, kredit bürosuna çevirmək planlaşdırılır. Fərq bundadır ki, reyestr AMB-nin nəzarəti altında olan maliyyə institutları - banklar, bank olmayan kredit təşkilatları haqqında məlumatı daxil edə bilər. Hüseynovun rəyin görə, kredit bürosu maliyyə institutları ilə yanaşı, rabitə müəssisələrinə, kreditlə mal satan ticarət obyektlərinə müştərilərin kredit tarixləri haqqında məlumat verə bilər. MKR-in potensialının genişləndirilməsi məqsədilə, reyestrdə proqram təminatının və texnoloji prosesin yeniləşdirilməsi zəruridir.
"Nəzərdə tutulmuş tədbirlər reallaşdırılarsa, 2-2,5 il ərzində kredit reyestrinin imkanlarını genişləndirmək mümkün olacaq", - AMB-nin nümayəndəsi hesab edir.
Beynəlxalq ekspertlərin tövsiyyələri əsasında MKR-də artıq ayrıca struktur vahidi - AMB nəzdində Mərkəzləşdirilmiş Kredit Reyestri Xidməti fəaliyyət göstərir. Kredit tarixlərinin aparılması üzrə özəl strukturuların yaradılması "Kredit reyestri haqqında" qanun layihəsinin qəbulundan sonra mümkün olacaq.
Bu gün 2005-ci ilin martından AMB nəzdində fəaliyyət göstərən MKR-in istifadəçiləri yalnız banklardır. "Bank olmayan kredit təşkilatları haqqında" qanun layihəsinin qəbulundan sonra BOKT-da kredit reyestrinə çıxış əldə edəcək.
Hazırda MKR-dən məlumat mübadiləsi prosesini on-line rejimə keçirmək üçün reyestrin məlumat bazası tamamilə yenilənib.
İyunun 6-na olan rəsmi məzənnə - 0,8193 AZN/USD.
Müəlliflə əlaqə saxlamaq üçün elektron ünvan: [email protected]
