Azərbaycan, Bakı, 10 iyul / Trend , müxbir U.İsmayılova/ Ötən il Azərbaycanın sığorta şirkətlərinin sığorta haqları təqribən 150 mln. manat təşkil edib. Bu göstərici 2003-cü ildə 75 mln. manata bərabər olub. Bu barədə ölkənin Maliyyə Nazirliyi yanında Dövlət Sığorta Nəzarəti Şöbəsinin rəhbəri Namiq Xəlilov cümə axşamı I Azərbaycan Beynəlxalq Sığorta Forumunda bildirib.
Ötən ilin sığorta haqları strukturunda 98,9 faiz ümumi sığorta, 1,1 faiz həyat sığortası, 9,7 faiz könüllü, 9,3 faiz icbari sığorta növünün payına düşüb.
Sığorta dərəcəsi üzrə haqlar strukturunda birinci yeri avtomobil sahibləri sığortası tutub - 26 faiz. Bu strukturda mülki məsuliyyət sığorası - 22 faiz, əmlak -12 faiz, icbari dövlət sığortası - 11 faiz, tibbi sığorta 9 faiz təşkil edib.
"Əgər 2003-cü ildə sığorta haqlarının 70 faizi xarici şirkətlərdə təkrar sığorta müdafiəsinin cəlb edilməsinə sərf olunurdusa, 2007- ci ildə bu göstərici cəmi 40 faiz təşkil edib. 2003-cü ildə bütün təkrarsığorta haqları xarici şirkətlər tərəfindən ödənmişdisə, 2007-ci ildə təkrarsığorta haqlarının 40 faizi yerli bazara yönəldilib", - deyə Xəlilov bildirib.
Azərbaycan Sığortaçılar Assosiasiyası tərəfindən təşkil olunan forum iyulun 10-11 - də keçirilir.
Forum Azərbaycanın sığorta bazarının inkişaf tendensiyaları, Avropa ölkələri sığorta bazarı təcrübəsinin Azərbaycanın sığorta sektorunun inikşafına təsiri, həyat sığortasının inkişafı, Azərbaycanın sığorta bazarının ölkənin maliyyə sistemi və sığortada korporotiv idarəçilik kimi təhlilinə həsr olunub.
"Standard Insurance" "Bakı Sigorta", "ATA Sigorta", "AzerSigorta", "Atesgah", "AZ Sigorta", "Beynelxalg Sigorta Sirketi", "AzRE tekrarsigorta", "MBASK" şirkətləri və "Rusiya" Sığorta Cəmiyyəti forumun rəsmi sponsorlarıdır. Sponsor qismidə "Audatex", "FADATA", "A Group", "Alfa Insurance", "Polish Reinsurance Company", "ROSNO", "Thames Insurance Group", "UnityRe", "SFS", "Ingosstrakh", "Qarant Siğorta" şirkətləri çıxış edir.
İnformasiya dəstəyi Trend -a məxsusdur
Məqalə müəllifi ilə əlaqə ünvanı: [email protected]
