Azərbaycan, Bakı, 31 iyul/ Trend , müxbir E.İsmayılov/ Beynəlxalq maliyyə institutları "2008-2011-ci illərdə Azərbaycanın dəmir yolunun inkişafı Dövlət Proqramını"nın maliyyələşdirilməsi həcmini, proqramın 1,25 milyard manatdan 2 milyard manatadək bahalaşması ilə əlaqədar artıra bilərlər, - cümə axşamı Azərbaycan Dövlət Dəmir Yolu İdarəsinin baş mühəndisi Qurban Nəzirov deyib. Maliyyələşmənin həcmi dövlət tərəfindən də artırılacaq.
"Proqram bahalaşdığına görə beynəlxalq maliyyə təşkilatları maliyyələşmənin həcmini avtomatik artırmalıdırlar", - Nəzirov bildirib.
Proqramın dəyəri artan inflyasiya və yeni texnologiyaların tətbiqi sayəsində 1,25 milyard manatdan 2 milyard manatadək artıb.
Proqramın əksər hissəsi dövlət vəsaitləri və Dəmir Yolu İdarəsi tərəfindən ayrılan şəxsi vəsaitlər hesabına maliyyələşəcək. Maliyyələşməni beynəlxalq maliyyə institutları, o cümlədən Dünya Bankı (DB) da təqdim edəcək. DB proqram bahalaşanadək, bu proqram çərçivəsində reallaşdırmaq istədiyi işlərin aparılması üçün $450 mln. ayırmağı planlaşdırıb.
Proqram çərçivəsində layihələrin reallaşdırılması işinə 2009-cu ildə başlanılması və dörd il müddətində başa çatdırılması planlaşdırılıb. Proqramın reallaşması nəticəsində Azərbaycanın dəmir yolu üzrə yük axını ildə 20-25 mln. ton artacaq.
Proqram çərçivəsində Azərbaycanın dəmir yolunun dünya standartlarına uyğun səviyyədə fəaliyyətinin təşkili üçün işlər görüləcək.
Proqram artıq hazırdır və yaxın vaxtlarda onun ölkə rəhbərliyi tərəfindən təsdiqlənəcəyi gözlənilir. Proqramın əsas istiqaməti Azərbaycanın dəmir yolunda korporativ yenidənqurma işlərinin, idarəetmə sisteminin təkmilləşdirilməsi, infrastrukturun yenilənməsi, normativ-hüquqi bazanın təkmilləşdirilməsi və beynəlxalq münasibətlərin genişləndirilməsindən ibarətdir.
Proqarmda əsas yeri dəmir yollarının beynəlxalq standartlara uyğun yenidən qurulmasını nəzərdə tutan infrastruktur layihələrin reallaşdırılması tutur. Bu işlər yük axınının artırılmasını, sərnişinlərin hərəkəti üçün şəraitin yaradılmasını, hərəkət sürətinin artırılmasını, yüklərin təhlükəsiz və vaxtında çatdırılmasını təmin edəcək. Yenidənqurma işləri "Şimal-Cənub"və "Şərq-Qərb"istiqamətində yük axınının və daşımaların vaxtında təmin edilməsinə də imkan verəcək.
