Azərbaycan, Bakı, 15 avqust/ Trend , müxbir İ.Xəlilova/ Böyük Britaniya Azərbaycana yatırılan sərmayələrin həcminə görə lider mövqeyini qorumaqda davam edir və yeddi ay ərzində onun xüsusi çəkisi xarici sərmayələrin ümumi həcminin 46,5 faizini təşkil edib. Bu barədə cümə günü Dövlət Statistika Komitəsindən məlumat veriblər. Buna baxmayaraq, onun sərmayələri, ötən ilin analoji dövrü ilə müqayisədə, 5,6 faiz azalıb və 634,499 mln. manat olub.
Yanvar-iyul ərzində xarici ölkələr və beynəlxalq təşkilatlar tərəfindən Azərbaycan iqtisadiyyatına yatırılmış sərmayələrin 93,5 faizi (1277,1 mln. manat) Böyük Britaniya, ABŞ, Yaponiya, Norveç, Türkiyə və Cənubi Koreyadan olan sərmayədarların payına düşür.
Amerika sərmayələri 18,4 faiz azalaraq, 289,599 mln. manat (xüsusi çəkisi 21,2 faiz), yapon - 19,6 faiz azalaraq 148,957 mln. manat (10,9 faiz), Norveç - 20,4 faiz azalaraq 93,111 mln. mln. manat (6,8 faiz), türk - 19,6 faiz azalaraq 73,721 mln. manat (5,4 faiz), Cənubi Koreya - 37,216 mln. manat (2,7 faiz) təşkil edib. Fransanın sərmayələri 2,4 dəfə artaraq 13,769 mln. manat (1 faiz), İran - 26,6 faiz azalmaqla - 9,422 mln. manat (0,7 faiz), alman - 4,1 dəfə artmaqla 10,321 mln. manat (0,8 faiz), Rusiya - 3,9 dəfə artmaqla - 3,885 mln. manat (0,3 faiz) və s. təşkil edib.
BMİ-dən ən böyük 19,143 mln. manat həcmində sərmayə 68,1 artımla və xüsusi çəkisi 1,4 faiz olmaqla, Dünya Bankı tərəfindən yatırılıb. Asiya İnkişaf Bankı yanvar-iyulda Azərbaycanda reallaşdırılan layihələrə azalma 43,2 faiz olmaqla 6,038 mln. manat (0,5 faiz), AYİB - azalma 28,5 faiz olmaqla 5,442 mln. manat (0,4 faiz), İslam İnkişaf Bankı - artım 6,3 faiz olmaqla 3,801 mln. manat (0,3 faiz), Küveyt İqtisadi İnkişaf Fondu - artım 46,9 faiz olmaqla 2,652 mln. manat (0,2 faiz) vəsait yatırıb. İlk dəfə olaraq Uşaqların Müdafiəsi üzrə Beynəlxalq Təşkilat 15 min manat sərmayə yatırıb.
Avqustun 15 - nə olan cari məzənnə --- 0,8142 AZN/USD.
Müəlliflə əlaqə saxlamaq üçün elektron ünvan - [email protected]
