Azərbaycan, Bakı, 19 avqust/ Trend , müxbir Ü.İsmayılova/ Azərbaycanın sığorta bazarı həcminə görə Rusiya, Ukrayna və Qazaxıstan bazarlarından sonra dördüncü yeri tutur. Ölkə daxilində sürətli inkişafla əlaqədar bəzi şirkətlər xarici sığorta bazarlarına çıxmağa başlayıblar. Azərbaycanın iki sığorta şirkəti - "Beynəlxalq Sığorta Şirkəti" və Standard Insurance-ın bir müddət əvvəl Cənubi Osetiya ilə münaqişənin başladığı Gürcüstanda filialları var.
Sığorta şirkətlərindən çərşənbə axşamı Trend -a bildiriblər ki, Gürcüstandakı vəziyyət Azərbaycanın sığorta firmalarının filiallarının fəaliyyətinə təsir etməyib.
"Beynəlxalq Sığorta Şirkəti"nin (BSŞ) Tbilisidə yerləşən filialı fəaliyyətini davam etdirir və şirkət onun işini dayandırmaq niyyətində deyil, BSŞ -nin Marketinq Departamentinin mütəxəssisi Elnur Sadiqov bildirib.
"Gürcüstan filialı, işgüzar fəallığın azalmasına baxmayaraq, öz işini davam etdirir", - Sadiqov bildirib.
Standard Insurance Gürcüstanda nümayəndəliyin açılması ilə əlaqədar planlarını dəyişmək niyyətində deyil, - şirkətin İdarə Heyətinin sədr müavini Aydın Rəhmanov bildirib. Standard Insurance-ın Gürcüstan filialında təmir işləri davam etdirilir. "Ofis əvvəllər planlaşdırıldığı kimi, oktyabrda açılacaq", - Rəhmanov bildirib.
Avqustun 8-nə keçən gecə Gürcüstan hərbi qüvvələri Cənubi Osetiyanın paytaxtı Tsxinvaliyə zərbə endiriblər. Avqustun 9 - dan Rusiya Cənubi Osetiya ərazisindəki rusiyalıları müdafiə etmək məqsədilə sülhə məcburetmə əməliyyatına başlayıb. Avqustun 12- də RF prezidenti Dmitri Medvedyev hərbi əməliyyatların başa çatdığını bəyan edib. Lakin Gürcüstanda qeyri-sabit vəziyyət hələ də qalır.
Müəlliflə əlaqə saxlamaq üçün elektron ünvan: [email protected]